پاکستان نے بھارتی وزیر کے آزاد جموں و کشمیر کے حوالے سے پرفریب اشتعال انگیز بیان کو سختی سے مسترد کر دیا ہے۔

اپنے ایک بیان میں ترجمان دفترخارجہ عاصم افتخار احمد نے کہا ہے کہ پاکستان بھارتی بی جے پی کے وزیر کے آزاد کشمیر کے موجودہ بھارتی حکومت میں انضمام کے پرفریب اشتعال انگیز بیان کو سختی سے مسترد کرتا ہے۔

انہوں نے کہا کہ انتخابی مفادات کے لیے پاکستان کو اپنی اندرونی سیاست میں گھسیٹنا بی جے پی، آر ایس ایس قائدین کا وطیرہ بن چکا ہے، اس کا مقصد بھارتی عوام کی اندرونی مسائل سے توجہ ہٹانا اور انتخابی مفادات کے لیے نیشنل ازم کو فروغ دینا ہے۔

ترجمان دفترخارجہ کا کہنا تھا کہ  بھارتی قائدین کو ایسے بے بنیاد تصورات سے دوری اختیار کرنے کا مشورہ دیتے ہیں، بھارتی قائدین کو غیر قانونی مقبوضہ کشمیر میں ابتر زمینی صورتحال کے حقائق  کے ادراک کا مشورہ دیتے ہیں۔

عاصم افتخار احمد نے کہا کہ دھائیوں کے بلا روک ٹوک بھارتی غیر قانونی قبضہ اور 5 اگست 2019 کے یکطرفہ غیر قانونی اقدامات کے باوجود وقت کے ساتھ کشمیریوں کی مزاحمت مضبوط ہوئی ہے۔

ان کا کہنا تھا کہ بھارتی بی جے پی وزراء کو یاد رکھنا ہو گا کہ جموں و کشمیر ایک بین الاقوامی تسلیم شدہ تنازع ہے، جموں و کشمیر بیں الاقوامی طور پر اقوام متحدہ سلامتی کونسل کے ایجنڈا پر موجود متنازع علاقے ہے۔

 عاصم افتخار احمد نے کہا کہ اقوام متحدہ سلامتی کونسل کی متعدد قراردادوں کشمیریوں کی خواہشات اور آزادانہ و منصفانہ استصواب رائے کے ذریعہ جموں و کشمیر تنازع کا حل تجویز کرتی ہیں۔

ترجمان دفترخارجہ عاصم افتخار احمد کا مزید کہنا تھا کہ بھارت غیر قانونی مقبوضہ کشمیر سے اپنا غیر قانونی قبضہ ختم کرے، بھارت اپنے قابض افواج کے نہتے کشمیریوں کے خلاف مظالم کے احتساب کے لیے تیار رہے۔