وزارت داخلہ نے چیف جسٹس ریٹائرڈ گلزار احمد کو فول پروف سیکیورٹی دینے کی منظوری دے دی۔

تفصیلات کے مطابق ‏سابق چیف جسٹس گلزار احمد کی طرف سے 27 جنوری کو وزارت داخلہ کو خط لکھا گیا تھا۔

خط میں وزارتِ داخلہ کو بتایا گیا کہ چیف جسٹس ریٹائرڈ گلزار احمد نے اپنے عہدے کی مدت کے دوران بہت سے ہائی پروفائل آئینی، فوجداری، بنیادی حقوق، سرکلر ریلوے، سرکاری افسران اور اقلیتوں کے حقوق سے متعلق مقدمات سنے اور ان پر فیصلے کیے ہیں۔

خط میں مزید کہا گیا کہ سپریم کورٹ قواعد شق نمبر 25(1) کیمطابق چیف جسٹس کو ریٹائرمنٹ کے بعد بھی سیکیورٹی دی جاتی ہے۔

خط کے مطابق چیف جسٹس ریٹائرڈ گلزار احمد اور ان کے اہلِ خانہ کی زندگی کو شدید خطرات لاحق ہیں، اس لیے کسی بھی ناخوشگوار واقعہ سے بچنے کیلئے لازمی ہے کہ چیف جسٹس ریٹائرڈ گلزار احمد اور ان کے اہلِ خانہ کو ریٹائرمنٹ کے بعد بھی بہ طور چیف جسٹس پاکستان ملنے والی سیکیورٹی فراہم کی جائے۔

وزارت داخلہ نے چیف جسٹس ریٹائرڈ گلزاراحمد کو فول پروف سیکیورٹی دینے کی منظوری دے دی۔

چیف جسٹس ریٹائرڈ گلزار احمد کو  رینجز اور پولیس کی ٹیم پر مشتمل سیکیورٹی اسکواڈ دیا جائے گا۔

واضح رہے کہ جسٹس ریٹائرڈ گلزار احمد کے بطور چیف جسٹس سپریم کورٹ آف پاکستان اپنے عہدے سے ریٹائر ہونے کے بعد جسٹس عمر عطا بندیال نے 28ویں چیف جسٹس کے عہدے کا حلف لیا ہے۔