سائنسدانوں نے کہا ہے کہ ویکسین لگوانے کے بعد 90 منٹ کی معتدل اور قدرے سخت ورزش سے نہ صرف ویکسین کی افادیت بڑھ سکتی ہے بلکہ اس سے جسم میں اینٹی باڈیز کی پیداوار میں بھی اضافہ ہوسکتا ہے۔ لیکن شرط یہ ہے کہ فوری طور پر ورزش اختیار کی جائے۔

آئیووا یونیورسٹی کے سائنسدانوں نے اس ضمن میں اپنی ایک تحقیق شائع کی ہے جس میں کہا گیا ہے کہ 90 منٹ کی جامد یا حرکتی سائیکلنگ یا پھر ڈیڑھ گھنٹے کی واک فوری طور پر ویکسین کی پیداوار بڑھاتی ہے۔ اس سے ورزش کا ایک اور شاندار فائدہ سامنے آیا ہے اور غالب امکان ہے کہ اس سے دوسری اقسام کی ویکیسینیشن کی افادیت بھی بڑھائی جاسکتی ہے۔ یہ افادیت اینٹی باڈیز کی صورت میں سامنے آئی ہے جو جسم کو انفیکشن سے لڑنے کے لیے مزید قوی بناتی ہیں۔

تحقیق کے لیے ماہرین نے کورونا ویکسین لگوانے والے مردوزن کو دو گروہوں میں تقسیم کرکے چار ہفتوں تک انہیں ایک معمول سے گزارا۔ پہلے گروہ کے افراد ویکسین شدہ ہونے کے بعد معمول کے کام پر لگ گئے جبکہ دوسرے گروہ کو اس دوران ورزش یا واک کرنے کو کہا گیا۔

دوسری جانب تجربہ گاہ میں عین یہی طریقہ چوہوں پر بھی آزمایا گیا ہے اور اس کے بھی یکساں نتائج برآمد ہوئے ہیں۔ لیکن یاد رہے کہ ان تمام افراد کو فائزز بایون ٹیک کووڈ 19 ویکسین دی گئی تھیں۔ اسی طرح فلو کی ویکسین لگوانے والوں میں بھی ورزش کے وہی فوائد سامنے آئے اور دیگر کے مقابلے میں زیادہ اینٹی باڈیز دیکھی گئیں۔

اینٹی باڈیز ایک طرح سے انفیکشن کی تلاش اور تباہ کرنے کا کام کرتی ہے خواہ وہ مضر بیکٹیریا ہوں یا کوئی وائرس۔ یہ تحقیق برین، بہیوویئر اینڈ امیونٹی نامی سائنسی جریدے میں شائع ہوئی ہیں۔

تحقیق کے بعد ماہرین نے دنیا بھر کے افراد کو مشورہ دیا ہے کہ اگر ورزش ان کی زندگی میں شامل نہیں تو ویکسین لگوانے کے بعد اس بہانے ہی ورزش کریں تاکہ وہ اس عالمی وبا سے بچ سکیں۔