سائنسدانوں نے ایک تحقیق کے بعد خبردار کیا ہے کہ جن فربہ مردوں کو چربی زائد ہوتی ہے ان کی ہڈیاں دھیرے دھیرے اپنی کثافت (بون ڈینسٹی) کھوسکتی ہیں ۔ پھر ایک وقت ایسا آسکتا ہے کہ وہ بھربھری نرم ہڈیوں یا پھر گٹھیا اور جوڑوں کے درد کے شکار بھی ہوسکتےہیں۔

یہ تحقیقات اینڈوکرائن سوسائٹی کے جرنل آف کلینیکل اینڈوکرائنولوجی اینڈ میٹا بولزم میں شائع ہوئی ہے۔ اس سے قبل عام تاثر یہی تھا کہ مرد حضرات کےجسم میں چربی زیادہ ہونے کا مطلب یہ ہوسکتا ہے کہ ان کی ہڈیاں بھر چکنائیوں سے بھری اور مضبوط ہوسکتی ہیں لیکن اب اس کے برعکس نتائج برآمد ہوئے ہیں۔

اس ضمن میں یونیورسٹی آف شکاکو ان میڈیسن کے پروفیسر راجیش جین اور ان کے ساتھیوں نے اس ضمن میں دس ہزار سے افراد کا جائزہ لیا جن کی عمر 60 برس سے کم تھی۔

اس کا ڈیٹا نیشنل ہیلتھ اینڈ نیوٹریشن ایگزامنیشن سروے سال 2011 تا 2018 سے حاصل کیا گیا جن میں 10،800افراد کے وزن، بی ایم آئی ، چربی کی مقدار اور ہڈیوں کی صحت کا درست ترین جائزہ پیش کیا گیا تھا۔ اس دوران زائد چربی والے افراد اور ان کے ہڈیوں کے منفی اثرات سامنے آئے جس کی تفصیلات مقالے میں درج کی گئی ہیں۔

ماہرین نے کہا ہے کہ اب ڈاکٹروں کو موٹے، زائد چربی والے، پہلے سے ہڈی تڑوانے والے اور خاندانی ہسٹری والے بالخصوص بزرگ افراد میں ہڈیوں کا جائزہ لینا چاہئے۔

ماہرین کا خیال ہے کہ اس پہلو کو مدِنظر رکھ کر چربی کے حامل مردوں کو مزید پیچیدگیوں اور مشکلات سے بچایا جاسکتا ہے۔ تاہم دلچسپ بات یہ ہے کہ خواتین میں زائد چربی اور اس کے ہڈیوں پر منفی اثرات کم کم ہی سامنے آئے ہیں۔