جسمانی صحت اور فٹنس کے لئے پٹھوں یعنی مسلز کی مضبوطی بہت اہمیت رکھتی ہے، اس ضمن میں ماہرین کا کہنا ہے کہ دن بھر میں چند سیکنڈ تک وزن اٹھانا مسلز کو مضبوط بنانے میں اہم کردارادا کرتا ہے۔

یہ بات آسٹریلیا میں کی جانے والی ایک تحقیق میں سامنے آئی ہے۔

اس مقصد کے لئے ایڈتھ کوون یونیورسٹی نے جاپان کی نیگاتا یونیورسٹی آف ہیلتھ اینڈ ویلفیئر سے اشتراک کیا اور 39 صحت مند طالبعلموں کو اس تحقیق میں شامل کیا۔

اس تحقیق کے دوران تمام شرکاء کو ہر ہفتے دن میں 5 سیکنڈ تک مسلز کے زیادہ سے زیادہ کھچاؤ کی ورزش کرنے کو کہا گیا۔

تحقیق کے آغاز پر تمام شرکاء کو 3 گروپس میں تقسیم کر کے انہیں پٹھوں کی مضبوطی کے لئے مختلف ورزش کرنے کو کہاگیا تھا، اور 4 ہفتوں کے بعد مسلز کی مضبوطی کو دیکھا گیا۔

اسی تحقیق کے دوران 13 طالبعلوں کا ایک کنٹرول گروپ بھی بنایاگیا جس نے 4 ہفتوں تک کوئی بھی ورزش نہیں کی اور پھر ان کے بھی مسلز کی جانچ پڑتا ل کی گئی۔

تحقیق کے نتائج سے معلوم ہوا کہ وہ گروپ جس نے مسلز کی مضبوطی کے لئے ڈمبلزیا وزن اٹھانے والی ورزش کی 4 ہفتوں کے دوران مسلز کی مضبوطی میں 10 فیصد اضافہ ہوا، جبکہ دیگر 2 گروپس میں مسلز کی مضبوطی میں کم اضافہ ہوا۔

جبکہ ورزش نہ کرنے والے کنٹرول گروپ میں اس طرح کا کوئی اضافہ نہیں دیکھا گیا۔

محققین کا اس تحقیق کے نتائج کو دیکھتے ہوئے یہ کہنا ہے کہ مسلزکو مضبوط بنانے کے لئے بہت زیادہ وقت تک ورزش کرنے کی ضرورت نہیں ہے۔

انہوں نے مزید یہ بھی کہا کہ اس تحقیق کے مطابق کم وقت تک ورزش یعنی 4 ہفتوں تک صرف 60 سیکنڈز کی ورزش بھی مسلز کی مضبوطی میں اہم کردار ادا کرتی ہے۔

جبکہ لوگوں کی اکثریت کا خیال ہے کہ مسلز کی مضبوطی اور فٹنس حاصل کرنے کے لئے بہت زیادہ وقت لگانا پڑتا ہے لیکن اصل میں ایسا نہیں ہے بلکہ مختصر مگر معیاری ورزش سے بھی یہ ہدف حاصل کیا جاسکتا ہے اور مسل کا ہر کھچاؤ اہمیت رکھتا ہے، جیسا کہ اس تحقیق کے نتائج سے ثابت ہوا ہے۔

محققین کا اس ضمن میں یہ بھی کہنا ہے کہ ان نتائج کو جسمانی فٹنس اور ہیلتھ کے لئے زبردست قرار دیا جاسکتا ہے روزانہ صرف چند سیکنڈ کی ورزش سے بھی بڑھتی عمر کے ساتھ مسلز کے حجم میں آنے والی کمی کی روک تھام کی جاسکتی ہے۔

محققین کا یہ بھی کہنا ہے کہ انہوں نے اس مختصر ورزش کا اثر صرف بازؤں پر دیکھا جبکہ جسم کے دیگر مسلز پر تحقیق نہیں کی اگر 3 سیکنڈ کے اصول کا اثر دیگر مسلز پر بھی ہوتا ہے آپ کو پورے جسم کی ورزش کے لئے 30 سیکنڈ سے بھی کم وقت درکار ہوگا۔

اس تحقیق کے نتائج اسکینڈے نیوین جرنل آف میڈیسین اینڈ سائسن ان اسپورٹس میں شائع کئے گئے ہیں۔