بولی وڈ کی خوبصورت ترین اور سدا بہار اداکارہ مادھوری دکشت نے ایک انٹرویو میں ماضی کے جھروکوں سے ایک یاد کو اپنے مداحوں کے ساتھ شئیر کیا۔

انہوں نے بتایا کہ وہ کس طرح ایک بار فلم “تیزاب” دیکھنے کے لیے  برقع پہن کر سنگل اسکرین تھیٹر پہنچی تھیں، اور جب “ایک دو تین” گانا آیا تو کس طرح مداحوں نے اسکرین پر سکوں کی بارش کردی تھی۔

مادھوری نے بتایا کہ فلم کی ریلیز کے بعد ہر کوئی مجھے بتا رہا تھا کہ میرا گانا “ایک دو تین” کتنا مقبول ہوا اور اسے تھیٹر میں بڑی اسکرین پر دیکھنے میں کتنا مزہ آتا ہے، تو میں نے فیصلہ کیا کہ میں بھی جا کر اسے دیکھوں گی۔ میں چندن سنیما گئی جو ایک سنگل اسکرین تھیٹر ہے۔

انہوں نے کہا کہ میں ذاتی طور پر یہ تجربہ کرنا چاہتی تھی کہ ہجوم کا ردعمل کیسا ہے۔ ہم اندر گئے اور بیٹھ گئے، میں برقعے میں تھی۔

مادھوری نے بتایا کہ ہم اگلی قطار کی سیٹوں پر بیٹھے تھے ،میں گانے کا انتظار کر رہی تھی اور جیسے ہی گانا شروع ہوا، ہمارے پیچھے سے لوگ اسکرین کی طرف سکے پھینکنے لگے، وہ سارے سکے ہمارے سروں پر لگ رہے تھے۔

این چندرا کی ہدایت کاری میں بننے والی فلم تیزاب میں انیل کپور نے بھی اداکاری کی اور یہ فلم 50 ہفتوں تک سینما گھروں میں چلی۔

 یہ 1988 کی سب سے زیادہ کمائی کرنے والی بولی وڈ فلم تھی۔ جبکہ “ایک دو تین” مادھوری کے سب سے یادگار گانوں میں سے ایک ہے۔

مادھوری فی الحال Netflix سیریز The Fame Game کے ساتھ اپنا ڈیجیٹل ڈیبیو کرنے کی تیاری کر رہی ہیں، جس میں وہ ایک سپر اسٹار کا کردار ادا کر رہی ہیں جو اچانک لاپتہ ہو جاتی ہے۔