وزیر خارجہ مخدوم شاہ محمود قریشی نے جمہوریہ کرغزستان کے وزیر خارجہ رسلان قازاک بائیف سے ٹیلیفونک رابطہ کیا ہے جس میں دونوں وزرائے خارجہ کے درمیان بڑھتے ہوئے دوطرفہ تعلقات کے تمام پہلوؤں پر گفتگو ہوئی۔

 اس موقع پر دونوں وزرائے خارجہ نے علاقائی امن و استحکام کی صورتحال پر بھی تبادلہ خیال کیا جبکہ دونوں وزرائے خارجہ نے اقتصادی اور انسانی امداد کے ذریعے افغانستان کی حمایت جاری رکھنے کے لیے مشترکہ کوششیں بروئے کار لانے پر اتفاق بھی کیا۔

ٹیلیفونک رابطے کے دوران دونوں وزرائے خارجہ نے اقوام متحدہ، او آئی سی، ایس سی او اور ای سی او سمیت علاقائی اور عالمی فورمز پر دونوں برادر ممالک کے درمیان قریبی تعاون پر اطمینان کا اظہار کرتے ہوئے مشترکہ مفاد کے تمام شعبوں میں دوطرفہ تعلقات کو مزید مضبوط بنانے کے لیے مشاورت کا سلسلہ جاری رکھنے پر اتفاق بھی کیا۔

اس موقع پر وزیر خارجہ شاہ محمود قریشی نے کہا کہ پاکستان اور کرغزستان کے درمیان، سیاسی، تجارتی، سرمایہ کاری، تعلیم و ثقافت کے شعبوں میں تعاون کو بڑھانے کے وسیع مواقع موجود ہیں۔

شاہ محمود قریشی نے دونوں ممالک کے درمیان اعلیٰ سطحی رابطوں، پارلیمانی تبادلوں اور ادارہ جاتی میکانزم کو مزید فعال بنانے کی ضرورت پر زور دیا۔

وزیر خارجہ مخدوم شاہ محمود قریشی کا مزید کہنا تھا کہ پاکستان اور کرغزستان کے درمیان دو طرفہ تعلقات کو مزید مستحکم بنانے کیلئے دونوں ممالک کے مابین براہ راست فضائی رابطے اور عوام سے عوام کے رابطوں کا فروغ، انتہائی اہمیت کا حامل ہے۔