الیکشن کمیشن آف پاکستان نے خیبر پختونخوا کے وزیر شاہ محمد کو پولنگ اسٹیشن پر حملے کے جرم میں 5 سال کے لیے نااہل قرار دے دیا ہے۔

الیکشن کمیشن آف پاکستان کی جانب سے خیبرپختونخوا میں بلدیاتی انتخابات کے دوران بنوں کی تحصیل بکاخیل میں امن وامان کیس سے متعلق اہم فیصلہ سنایا گیا جس کے تحت پی ٹی آئی کے صوبائی وزیر شاہ محمد کو 5 سال کے لیے نااہل قرار دے دیا گیا ہے۔

الیکشن کمیشن نے آرٹیکل 218 الیکشن ایکٹ اور سپریم کورٹ کے فیصلوں کی روشنی میں یہ فیصلہ جاری کیا گیا جس میں یہ کہا گیا ہے کہ صوبائی وزیر شاہ محمد کے بیٹے مامون الرشید بھی اگلے 5 سال تک کوئی الیکشن نہیں لڑسکتے جب کہ الیکشن کمیشن نے ان کے خلاف فوج داری مقدمہ درج کا فیصلہ بھی کیا ہے۔

خیال رہے کہ بکاخیل میں بلدیاتی انتخابات کے دوران نامعلوم افراد نے پولنگ اسٹیشنز کے عملے کو انتخابی مواد سمیت اغوا کرلیا تھا جس کے بعد الیکشن کمیشن نے وہاں الیکشن ملتوی کرنے کے احکامات جاری کیے تھے۔

الیکشن کمیشن کی جانب سے جاری فیصلے میں صوبائی وزیر شاہ محمد کو بکاخیل پولنگ اسٹیشنز پر حملے کا ذمہ دار قرار دیا گیا جب کہ الیکشن کمیشن نے ایم پی اے شاہ محمد کو ڈی نوٹیفائی بھی کردیا ہے۔

واضح رہے شاہ محمد نے پی کے 89 بنوں 3 سے پاکستان تحریک انصاف کے ٹکٹ پر فتح حاصل کی تھی جس کے بعد انہیں ٹرانسپورٹ کی وزارت دی گئی تھی۔