بلاول بھٹو زرداری نے کہا ہے کہ پاکستان پیپلزپارٹی کا لانگ مارچ ملکی سیاسی تاریخ کا ایک اہم سنگ میل ثابت ہوگا۔

پاکستان پیپلزپارٹی کے چیئرمین بلاول بھٹو زرداری کی ماڈل ٹاؤن میں پی پی پی جنوبی پنجاب کے صدر مخدوم احمد محمود ، مرتضی محمود، علی محمود، عطا گیلانی ودیگر سے ملاقات ہوئی۔

ملاقات میں بلاول بھٹو زرداری اور سابق گورنر پنجاب مخدوم احمد محمود کے درمیان سیاسی صورت حال پر تبادلہ خیال ہوا جبکہ لانگ مارچ کے لائحہ عمل پر بھی تفصیلی بات چیت ہوئی۔

اس موقع پاکستان پیپلزپارٹی کے چیئرمین بلاول بھٹو زرداری نے کہا کہ پاکستان پیپلزپارٹی کا لانگ مارچ ملکی سیاسی تاریخ کا ایک اہم سنگ میل ثابت ہوگا، پاکستان پیپلزپارٹی کے لانگ مارچ میں لاکھوں کی تعداد میں عوام کی شرکت عمران خان کی مقبولیت کا پول کھول کر رکھ دے گی۔

بلاول بھٹو زرداری نے کہا کہ پی ٹی آئی حکومت لانگ مارچ سے گھبرا کر پاکستان پیپلزپارٹی اور اس کے عوامی نمائندوں کے خلاف جھوٹے پروپیگنڈوں پر اتر آئی ہے، پاکستان پیپلزپارٹی کا لانگ مارچ عوام کی جانب سے عمران خان حکومت کے خلاف ایک چارج شیٹ ہوگی۔

پاکستان پیپلزپارٹی کے چیئرمین بلاول بھٹو زرداری نے مزید کہنا تھا کہ 27 فروری کو مہنگائی اور بے روزگاری سے ستائے عوام کے لشکر نکلیں گے اور اسلام آباد کا رخ کریں گے۔

ملاقات میں چیئرمین بلاول بھٹو زرداری کے ہمراہ حسن مرتضی، آصف بشیر بھاگٹ، عبدالقادر شاہین، قاسم گیلانی ودیگر موجود تھے۔