پاکستان  کرکٹ ٹیم کے سابق کپتان راشد لطیف نے آسٹریلیا کے خلاف تاریخی سیریز سے قبل بابر اعظم کی حمایت کرتے ہوئے کہا ہے کہ پاکستان سپر لیگ کے ساتویں ایڈیشن میں کراچی کنگز کی خوفناک کارکردگی کی وجہ بابرنہیں ہیں۔

تفصیلات کے مطابق کرکٹ پاکستان سے بات کرتے ہوئےکراچی کنگز کے سابق ڈائریکٹر راشد لطیف نے کہا کہ فرنچائز کو ڈرافٹ میں بہتر کارکردگی دکھانے کی ضرورت ہے اور اسے اپنے نقطہ نظر کے ساتھ زیادہ پیشہ ورانہ ہونا چاہیے۔

راشد لطیف  کوئٹہ گلیڈی ایٹرز کے لیے بھی یہی رائے رکھتے ہیں اور انہیں فرنچائز کے انتظام کے لیے پیشہ ور افراد کی خدمات حاصل کرنے کا مشورہ دیا۔

راشد لطیف نے کہا کہ پہلی بات یہ ہے کہ انہیں ڈرافٹ کو سنجیدگی سے لینے کی ضرورت ہے۔

انہوں نے کہا کہ میری نظر میں کراچی اور کوئٹہ ڈرافٹ کے دن دونوں پیشہ ور نہیں تھے ۔

لطیف نے کھلاڑیوں کو چنتے وقت ڈیٹا کا مکمل مطالعہ کرنے پر توجہ مرکوز کی اور امید کر رہے ہیں کہ کراچی کنگز اگلے سال ڈرافٹ میں بہتر کارکردگی کا مظاہرہ کرے گی۔

ان کا کہنا تھا کہ ٹاپ تھری میں کراچی کا صرف شرجیل تھا ورنہ کوئی پاور ہٹر نہیں تھا، بہت سی غلطیاں ہوئیں اور وہ اس سے سبق سیکھیں گے۔

راشد لطیف کا مزید کہنا تھا کہ  امید ہے کہ وہ دوبارہ یہ غلطیاں نہیں کریں گے۔

راشد  بابر اعظم کی حمایت میں کہا کہ لوگوں کو پی ایس ایل کی بنیاد پر ان کی کپتانی کا فیصلہ نہیں کرنا چاہیے کیونکہ انہیں آئی سی سی ٹی ٹوئنٹی اور ون ڈے ٹیم آف دی ایئر کا کپتان نامزد کیا گیا تھا۔