پرویزخٹک نے کہا ہے کہ اپوزیشن کو کہنا چاہتا ہوں کہ ہم سوئے ہوئے نہیں۔

وزیر دفاع پرویز خٹک نے کہا ہے کہ جو ممبر پی ٹی آئی اور وزیراعظم  کیخلاف ووٹ ڈالے گا وہ نااہل ہوجائے گا، جب ممبر نااہل ہوگا تو یہ اعتماد کا ووٹ نہیں لے سکیں گے۔

انہوں نے کہا کہ اپوزیشن کو کہنا چاہتا ہوں کہ ہم سوئے ہوئے نہیں، اتنا آسان نہیں کہ ہمارے خلاف تحریک عدم اعتماد  لے آئیں، تحریک عدم اعتماد کا ڈرامہ بنا ہواہے، اپوزیشن سے ڈبل ہم تیار ہیں۔

پرویز خٹک نے کہا کہ کوئی تحریک عدم اعتماد نہیں آرہی،  صرف لوگوں کو دھوکہ دے رہے ہیں، کوئی ان ہاؤس تبدیلی نہیں آرہی، ہم اپنے ممبران کے ساتھ رابطے میں ہیں، ہم نے اپنی تیاری کی ہے، ہر چیز کے لئے تیار ہیں۔

وزیر دفاع پرویز خٹک نے کہا کہ وزیراعظم 5سال مکمل کرینگے، ہمارے اتحادی ہمارے ساتھ ہیں، اپوزیشن جو مرضی کرلے، تحریک عدم اعتماد ناکام ہے اور رہے گی۔

انہوں نے کہا کہ اتحادی جماعتوں کا وزارت سے متعلق کوئی مطالبہ نہیں، وعدے پورے کرینگے، جو ایک دوسرے کو گالیاں اور سڑکوں پر گھسٹنے کی باتیں کرتے تھے آج وہ ایک ساتھ  ہیں۔

پرویز خٹک نے کہا کہ اپوزیشن کو ڈر ہے کہ ان کے کیسز کھل جائیں گے، جب تک وزیراعظم عمران خان ہیں، ادارے ان کے ساتھ ہیں، اپوزیشن نے پھر ہارس ٹریڈنگ کی باتیں شروع کردی ہے۔

وزیر دفاع نے کہا کہ کسی مخالف ایم این اے یا ایم پی اے کو ساتھ ملانا ہارس ٹریڈنگ ہے، تحریک عدم اعتماد کا ڈرامہ بنا ہواہے، اپوزیشن سے ڈبل ہم تیار ہے۔