سندھ ہائیکورٹ نے اہم حکم نامہ جاری کرتے ہوئے ایس بی سی اے سے شہر میں تعمیر ہونے والی بلڈنگ کا معائنہ کرنے والے انجئینرز کی فہرست طلب کرلی

سندھ ہائی کورٹ میں سول لائن میں تعمیر شدہ امیر ہاؤس کی انسپیکشن سے متعلق دراخوست کی بھی سماعت ہوئی۔

عدالت نے  حکم نامہ جاری کرتے ہوئے ایس بی سی اے سے کہا کہ ایس بی سی اے کے پینل یا جن انجئینرز کی اس حوالے سے خدمات حاصل کی جاتی ہیں ان کی مکمل فہرست پیش کی جائے۔

وکیل نے عدالت کو بتایا کہ عدالت نے ستمبر 2020 میں امیر ہاؤس کی انسپیکشن کا حکم دیا تھا۔ ایس بی سی اے نے عدالت کے 2020 کے حکم پر تاحال عمل درآمد نہیں کیا۔

ایس بی سی اے کے وکیل کی جانب سے 2020 کے احکامات پر عمل درآمد کے لیے عدالت سے مہلت طلب کر لی۔

عدالت نے ایس بی سی اے کو عمل درآمد کے لیے پندرہ دن کی مہلت دیتے ہوئے حکم دیا کہ آئندہ سماعت تک عدالتی احکامات پر عمل درآمد نہیں ہوا تو ڈی جی ایس بی سی اے ذاتی حثیت میں پیش ہوں۔

عدالت نے درخواست کی مزید سماعت تین ہفتوں کے لیے ملتوی کردی۔

واضح رہے کہ جمال صدیقی نے بلڈنگ کی انسپیکشن کے لیے عدالت سے رجوع کر رکھا ہے۔

دوسری جانب سندھ ہائی کورٹ میں کنٹونمنٹ بورڈز میں بڑے پیمانے پر بغیر انفراسٹرکچرل انجینئرز منظوری تعمیرات کے خلاف درخواست کی بھی سماعت ہوئی۔

عدالت نے کنٹونمنٹ بورڈ کلفٹن سے جامع رپورٹ طلب کرتے ہوئے کیس میں ریمارکس دیے کہ بتایا جائے، کنٹونمنٹ بورڈ کلفٹن میں گراؤنڈ پلس ٹو کتنی عمارتیں ہیں؟ بتایا جائے کہ کنٹونمنٹ بورڈ کلفٹن کے پینل پر کتنے انفراسٹرکچرل انجینئرز ہیں؟

عدالت نے کیس میں ریمارکس دیتے ہوئے کہا کہ بتایا جائے، کنٹونمنٹ بورڈ کلفٹن کی حدود میں کتنی عمارتوں کے خلاف ایکشن لیا؟ کنٹونمنٹ بورڈ کلفٹن میں کتنی عمارتیں بغیر منظوری کے بنائی گئیں؟

دوران سماعت عدالت کا کنٹونمنٹ بورڈ کلفٹن وکیل سے مکالمہ ہوا۔

عدالت نے ریمارکس دیے کہ یہ دہلی کالونی اور اطراف میں گیارہ گیارہ منزلہ عمارتیں کیسے بن رہی ہیں؟ جب یہ گرنا شروع ہوئیں تو معلوم ہے کیا ہوگا؟ کس قانون کے تحت گیارہ گیارہ منزلہ عمارتیں بنا رہے ہیں؟ آپ کی حدود میں تو گراؤنڈ پلس ٹو سے زائد کی اجازت نہیں۔