وزیر داخلہ شیخ رشید احمد نے کہا ہے کہ پاکستان سعودی عرب کے ساتھ اپنے تعلقات کو بہت اہمیت دیتا ہے۔

سعودی وزیر داخلہ پرنس عبدالعزیز بن سعود بن نائف کی اپنے وفد کے ہمراہ وزارت داخلہ آمد ہوئی جہاں انہوں نے وزیر داخلہ شیخ رشید احمد اور وزارت داخلہ کے اعلیٰ حکام سے ملاقات کی۔

ملاقات میں علاقائی سکیورٹی صورتحال سمیت باہمی دلچسپی کے دیگر امور پر بات چیت کی گئی جبکہ پاکستان اور سعودی عرب کے داخلہ امور کی وزارتوں کے درمیان روابط کو مزید مضبوط کرنے پر بھی زور دیا گیا۔

وزیر داخلہ شیخ رشید احمد نے کہا کہ پاکستان اورسعودی عرب کے درمیان تعلقات انتہائی دیرینہ ہیں، پاکستان سعودی عرب کے ساتھ اپنے تعلقات کو بہت اہمیت دیتا ہے۔

شیخ رشید احمد نے کہا کہ سعودی عرب میں کام کرنے والے بیس لاکھ پاکستانی ہمارا قیمتی اثاثہ ہیں۔

وزیر داخلہ شیخ رشید احمد کا مزید کہنا ہے کہ پاکستانی ورکرز کی بہترین دیکھ بھال پر سعودی حکومت کے شکر گزار ہیں۔

اس موقع پر سعودی وزیر داخلہ پرنس عبدالعزیز بن سعود بن نائف نے کہا کہ پاکستان اور سعودی عرب کے درمیان تعلقات باہمی اعتماد اور اسلامی بھائی چارے پر قائم ہیں۔

ملاقات میں مشیر برائے احتساب بریگیڈیئر ریٹائرڈ مصدق عباسی اور سیکرٹری داخلہ یوسف نسیم کھوکھر سمیت دیگرحکام نے شرکت کی۔

یاد رہے کہ سعودی وزیر داخلہ پرنس عبدل عزیر بن سعود بن نائف کیساتھ 7 رکنی اعلی سعودی حکام کا وفد بھی پاکستان پہنچا ہے، سعودی وزیر داخلہ اپنے پاکستانی ہم منصب شیخ رشید احمد کی خصوصی دعوت پرایک روزہ دورے پرپاکستان پہنچیں ہیں۔