وزیراعظم نے بلوچستان میں دہشت گرد حملوں کی کوشش کو ناکام بنانے  والے بہادر سیکیورٹی فورسز کو سلام پیش کیا ہے۔

وزیراعظم عمران خان نے سوشل میڈیا پر جاری اپنی ٹوئٹ میں کہاکہ ہم اپنی بہادر سیکیورٹی فورسز کو سلام پیش کرتے ہیں جنہوں نے پنجگور اور نوشکی، بلوچستان میں سیکیورٹی فورسز کے کیمپوں پر دہشت گردانہ حملوں کو ناکام بنایا۔

We salute our brave security forces who repulsed terrorist attacks against security forces’ camps in Panjgur & Naushki, Balochistan. The nation stands united behind our security forces who continue to give great sacrifices to protect us.

— Imran Khan (@ImranKhanPTI) February 3, 2022

وزیراعظم نے کہاکہ قوم ہماری سیکیورٹی فورسز کے پیچھے متحد ہے جو ہماری حفاظت کے لیے بڑی قربانیاں دے رہی ہیں۔

بلوچستان میں دہشتگرد حملوں کی کوشش کو فورسز نے ناکام بنا دیا

بلوچستان کے علاقے پنجگور اور نوشکی میں دہشتگرد حملوں کی کوشش کو سیکیورٹی فورسز نے ناکام بنادیا اور فائرنگ کے شدید تبادلے میں ایک سپاہی شہید ہوگیا۔

پاک فوج کے شعبہ تعلقات عامہ (آئی ایس پی آر) کے مطابق دہشت گردوں نے گزشتہ شام بلوچستان کے 2 مقامات پنجگور اور نوشکی میں سیکیورٹی فورسز کے کیمپوں پر حملے کی کوشش کی۔

ترجمان پاک فوج کے مطابق دہشت گردوں کو بھاری جانی نقصان پہنچاتے ہوئے دونوں حملوں کو کامیابی سے پسپا کر دیا گیا۔

آئی ایس پی آرکے مطابق پنجگور میں دہشت گردوں نے 2 مقامات سے سیکیورٹی فورسز کے کیمپ میں داخل ہونے کی کوشش کی تاہم فوجی جوانوں کی بروقت جوابی کارروائی نے دہشت گردی کی کوشش کو ناکام بنا دیا اور 4 دہشت گرد مارے گئے۔

ترجمان پاک فوج کے مطابق شدید فائرنگ کے تبادلے میں ایک جوان شہید ہوگیا جب کہ دہشت گرد فرارہوگئے ہیں اور کچھ کی ہلاکتوں کا تعین کیا جا رہا ہے۔

آئی ایس پی آر کے مطابق نوشکی میں دہشت گردوں نے ایف سی کیمپ میں گھسنے کی کوشش کی جس کا بھرپور جواب دیا گیا۔