برطانیہ نے 5 سے 11 سال کی عمر کے بچوں کے لیے کورونا ویکسین لگوانے کی مدت میں توسیع کردی

برطانیہ کی نیشنل ہیلتھ سروس نے اتوار کو اپنے کورونا ویکسینیشن پروگرام میں توسیع کی ہے تاکہ 5 سے 11 سال کی عمر کے  بچوں کا احاطہ کیا جا سکے۔ ویکسین لگوانے کے لئے وہ بچے اہل ہوں گے  جو ذیابطیس سمیت دیگر سنگین بیماریوں میں مبتلا نہ ہوں۔ نیشنل ہیلتھ سروس انگلینڈ اور حفاظتی ٹیکوں کی مشترکہ کمیٹی کا کہنا ہے کہ ملک بھر میں تقریباً 500,000  بچے کورونا ویکسین کی پہلی خوراک کے لیے تیار ہیں۔ 

نیشنل ہیلتھ سروس کے نائب سربراہ کا کہنا تھا کہ ہم جانتے ہیں کہ ویکسین کوویڈ سے ہونے والی شدید بیماری کے خلاف اہم تحفظ فراہم کرتی ہے۔ اس لیے یہ ضروری ہے کہ  کم عمر افراد کی حفاظت یقینی بنائی جائے۔

اب تک لاکھوں کی تعداد میں ٹیکے لگائے جانے کے باعث ہزاروں نوجوان محفوظ ہو رہے ہیں۔ ہماری والدین سے اپیل ہے کہ وہ آگے آنے میں دیر نہ کریں۔

نیشنل ہیلتھ سروس نے پہلے  12 سال سے زائد عمر کے گروپ کے لیے کورونا ویکسین کی منظوری دی تھی جس کے بعد بارہ سے سترہ سال کی عمر کے ساڑھے تین ملین لوگوں کو ویکسین فراہم کی گئی۔

برطانیہ کی ویکسین منسٹر میگی تھروپ کا کہنا تھا کہ میں چاہوں گی کہ والدین کو یقین دلایا جائے کہ بچوں کے لیے کوئی نئی ویکسین تب تک منظور نہیں کی جائے گی جب تک کہ ویکسین حفاظت، معیار اور تاثیر کے متوقع معیارات پر پورا نہ اترے۔

 یاد رہے، جے سی وی آئی  نے تازہ ترین رپورٹ جاری کی جس میں تمام 16 اور 17 سال کے بچوں کو ان کی دوسری خوراک کے بعد بوسٹر ڈوز حاصل کرنے کی سفارش کی گئی تھی۔