لاہور چڑیا گھر کے ایک اور جانور کی موت  ہوگئی ہے۔

تفصیلات کے مطابق چڑیا گھر کا زرافہ دم توڑ گیا ہے، آج صبح زرافہ کی موت ہوئی ہے جبکہ موت کی وجہ اب تک سامنے نہ آسکی۔

چڑیا گھر کے انتظامیہ کا اس حوالے سے کوئی موقف سامنے نہیں آسکا۔

واضح رہے کہ لاہور چڑیا گھر میں اب ایک ہی زرافہ موجود ہے۔

چڑیا گھر کے انتظامیہ کا موقف سامنے آگیا ہے انکا کہنا ہے کہ مرنے والا زرافہ بیمار تھا، زرافے کی موت غلط انجیکشن لگانے کی وجہ سے ہوئی۔

چڑیا گھر انتظامیہ نے بتایا کہ مرنے والے زرافے کا یونیورسٹی آف ویٹرنری سائنس سے پوسٹ مارٹم کروایا جائے گا۔

یاد رہے کہ کچھ ہفتے قبل ہی مظفرآباد میں بھی دریائے نیلم کے کنارے سے زخمی حالت میں ریسکیو کیا گیا چیتا دوران علاج چل بسا تھا۔

ڈائریکٹر وائلڈ لائف نعیم افتخار کا کہنا تھا کہ زخمی حالت میں ملنے والا چیتا گولی لگنے سے زخمی ہوا تھا، زخمی چیتے کو علاج کے لیے اسلام آباد منتقل کیا گیا تھا۔

محکمہ وائلڈ لائف کے مطابق زخمی چیتے کا اسلام آباد میں مکمل ایکسرے اور طبی معائنہ کیا گیا، اس کے جسم میں 6 ایل جی رائفل کے کارتوس پائے گئے تھے اور زخمی چیتے کی کمر بھی ٹوٹ گئی تھی جس کے باعث دوران آپریشن زخموں کی تاب نہ لاتے ہوئے چل بسا۔

ڈاکٹرز کے مطابق چیتے کی موت گولی لگنے اور ریڑھ کی ہڈی متاثر ہونے کے باعث واقع ہوئی۔

ڈائریکٹر وائلڈ لائف نعیم افتخار کا کہنا ہے کہ تحقیقات کی جارہی ہیں کہ گولی کس نے چلائی۔