صوبائی وزیر تعلیم شہرام خان ترکئی نے کہا ہے کہ کورونا کیسز کی وجہ سے 48 تعلیمی اداروں کو بند کر دیا گیا ہے۔

وزیر تعلیم خبیر پختونخوا شہرام خان ترکئی کی زیر صدارت کورونا صورتحال کے پیش نظر تعلیمی اداروں کے حوالے سے جائزہ اجلاس ہوا۔

اجلاس میں سیکرٹری ایجوکیشن یحییٰ اخونزادہ، ڈائریکٹر جنرل ہیلتھ سروسز ڈاکٹر نیاز، ڈائریکٹر ایجوکیشن خافظ محمد ابرہیم اور محکمہ صحت و تعلیم  کے دیگر اعلیٰ حکام نے شرکت کی۔

 صوبائی وزیر تعلیم نے اجلاس میں بریفنگ دیتے ہوئے کہا کہ جن تعلیمی اداروں میں کورونا کیسز سامنے آئے وہ تعلیمی ادارے صرف 7 دنوں کے لئے بند کیے جائیں۔

 انہوں نے کہا کہ محکمہ تعلیم کی جانب سے صوبے کے تمام ڈپٹی کمشنرز کو مراسلہ جاری کیا جائے، یکم فروری سے جاری کورونا ویکسین کمپین میں 12 سال سے زائد عمر کے تمام بچوں کی ویکسینیشن کو یقینی بنایا جائے۔

  شہرام ترکئی نے کہا کہ کورونا گائیڈ لائنز کے مطابق کم ویکسینیشن والے اسکولوں کے خلاف قانونی کارروائی ہوگی۔

 انکا کہنا ہے کہ محکمہ صحت صوبے کے تمام اضلاع کے نجی اور سرکاری سکولوں میں کورونا ٹیسٹنگ کی تعداد کو بڑھائے، کورونا کیسز کی وجہ سے 48 تعلیمی اداروں کو بند کر دیا گیا ہے، جن میں 18 میل اور 30 فیمیل سکول شامل ہیں۔  جبکہ ابھی تک 306 اساتذہ اور 630 طلباوطالبات کورونا سے متاثر ہیں۔

اجلاس میں وزیر تعلیم کو بریفنگ دی گئی کہ 21 لاکھ 66 ہزار آٹھ سو نجی اور سرکاری اسکولوں کے طلباء وطالبات جن کی عمر 12 سال سے زائد ہے کے تقریباً 55 فیصد ویکسینیشن مکمل کی گئی ہے۔

 بریفنگ میں بتایا گیا کہ نجی اور سرکاری اسکولوں کے تقریباً 82 فیصد ملازمین کی ویکسینیشن بھی مکمل ہے۔

وزیر تعلیم شہرام ترکئی نے مزید کہا کہ پورے صوبے کے تمام نجی اور سرکاری تعلیمی اداروں میں کورونا کی صورتحال کا خود جائزہ لے رہا ہوں۔