پی ایس ایل کے میچز اسٹیڈیم میں دیکھنے کی خواہش رکھنے والے بچے کی وڈیو وائرل ہونے کے بعد رمیز راجہ کا بیان سامنے آ گیا ہے۔

پی ایس ایل کو کورونا کے عفریب سے بچانے کے لئے پی سی بی نے 12 سال سے کم عمر بچوں کی اسٹیڈیم میں داخلے پر پابندی عائد کر رکھی تھی۔

پہلے میچ کے اختتام کے بعد اسٹیڈیم کے باہر فٹ پاتھ پر بیٹھے 11 سالہ حمزہ فراز اور اس کے دوستوں نے پی سی بی کی انتظامیہ سے درخواست کی تھی کہ انہیں پی ایس ایل کے میچز دیکھنے کے لئے اسٹیڈیم آنے کی اجازت دی جائے۔

حمزہ فراز نے اپنی وڈیو میں پی سی بی سے کہا تھا کہ ویک اینڈ پر 12 سال سے کم عمر بچوں کو اسٹیڈیم آنے کی اجازت دی جائے۔

حمزہ فراز کی یہ وڈیو سوشل میڈیا پر وائرل ہو گئی تھی، جس کے جواب میں پی سی بی کے چئیرمین رمیز راجہ نے معصوم حمزہ فراز اور اس کے دوستوں کو ایک وڈیو میں جواب دیا ہے۔

رمیز راجہ نے اپنی جوابی وڈیو میں حمزہ فراز کو کہا میں آپ کے جذبات کی قدر کرتا ہوں آپ کا پی اسی ایل سے پیار وڈیو میں نظر آرہا ہے ، لیکن بدقسمتی سے کورونا کے باعث بچوں کے اسٹیڈم میں داخلے پر پابندی ہے۔

رمیز راجہ نے حمزہ فراز کو امید دلاتے ہوئے کہا کہ میں نے آپ کی درخواست پر متعلقہ اداروں کو کہا ہے کہ کسی نہ کسی طرح 12 برس سے کم بچوں کو اسٹیڈیم میں آنے کی راہ ہموار کی جائے۔