بھارتی کرکٹ دشمنی ایک بار پھر عیاں ہوگئی۔ بی سی سی آئی سیکرٹری جے شاہ نے پی سی بی چیف رمیز راجہ کی 4 ممالک کے درمیان ٹی ٹوئنٹی سیریز کے انعقاد کو شارٹ ٹرم مالی اقدام قرار دے دیا۔

تفصیلات کے مطابق کھیل کی روح کے منافی اقدامات کرنے والے بھارت کی کرکٹ دشمنی ایک بار پھر عیاں ہوگئی۔ سیکرٹری بی سی سی آئی جے شاہ کا کہنا ہے کہ آئی پی ایل اور آئی سی سی ایونٹس کے بعد بچ جانے والے وقت میں ہماری اولین ترجیح ہوم کرکٹ سے متعلق ہے۔ اس کے ساتھ ساتھ ہم کرکٹ کے عالمی فروغ کے لیے اس کی شمولیت اولمپکس میں چاہتے ہیں۔

پی سی بی چیف رمیز راجہ نے حال ہی میں تجویز دی تھی کہ پڑوسی ممالک سمیت 4 ممالک کے درمیان سالانہ بنیادوں پر ٹی ٹوئنٹی کی سیریز کا انعقاد ہونا چاہئیے۔ اس مقصد کے لیے آئی سی سی اپنے ہی دائرہ کار میں ایک کمپنی رجسٹرڈ کرائے جس کا چیف ایگزیکٹو بھی الگ ہو، اس سیریز سے ہونے والی آمدنی آپس میں تقسیم کی جائے۔

وہ یہ تجویز جلد ہی آئی سی سی میں بھی پیش کرنے کا ارادہ رکھتے ہیں۔

علاوہ ازیں ، پی سی بی چیف نے اپنی ٹوئٹر اکاؤنٹ پر کہا تھا کہ فرنچائز لیگزکی موجودگی میں ٹی ٹوئنٹی سیریز کی افادیت باقی نہیں رہی ہے۔ جس طرز پر یورپ میں ٹاپ رگبی ممالک کے درمیان باہمی سیریز ہوتی ہے، اسی طرز پر روایتی حریفوں سمیت 4 ممالک کے درمیان ٹی ٹوئنٹی سیریز ہونی چاہئیے۔

تاہم، بی سی سی آئی سیکرٹری نے اس اقدام کو مختصر المدتی مالی اقدام قرار دے کر اس میں عدم دلچسپی کا اظہار کیا ہے۔ ان کا موقف ہے کہ آئی پی ایل کی ونڈو بڑھ چکی ہے۔ ٹیسٹ کرکٹ کا بچانا اور اس کے فروغ کے ضمن میں کام کرنا ہماری بنیادی ذمہ داری ہے۔