اینٹی نارکوٹکس فورس ( اے این ایف) اور اے این ایف راولپنڈی کی جانب سے صوبہ پنجاب کے شہر جہلم میں مشترکہ کارروائی کی گئی ہے۔

تفصیلات کے مطابق کارروائی جہلم کی تحصیل سوہاوہ بس اسٹاپ کے قریب دورانِ تلاشی کی گئی، کارروائی کے نتیجے میں سوزوکی بولان سے 7 کلوگرام چرس برآمد کی گئی۔

ترجمان اے این ایف نے بتایا کہ گاڑی میں سوار  راولپنڈی کے رہائشی ثاقب علی اور بہزاد حیدر اور لاہور کی رہائشی نسرین بی بی نامی 3ملزمان گرفتار کرلیے ہیں۔

ترجمان اے این ایف نے مزید بتایا کہ برآمد شدہ منشیات کی 4کلوگرام مقدارگرفتار ملزمہ کے ذاتی قبضے جبکہ 3کلوگرام مقدارمقبوضہ گاڑی کے خفیہ خانوں سے برآمد کی گئی۔

 ترجمان اے این ایف کا کہنا تھا کہ ملزمان کے خلاف انسداد منشیات ایکٹ کے تحت مقدمہ درج کر لیا گیا ہے اور مزید تفتیش جاری ہے۔

واضح رہے کہ کچھ دن قبل بھی   اینٹی نارکوٹکس فورس (اے این ایف) اور اے این ایف کراچی نے شہر قائد میں مشترکہ کارروائی کرتے ہوئے بھاری مقدار میں منشیات برآمد کی تھی۔

 کارروائی الآصف اسکوئر کے قریب کی گئی تھی جہاں تین ملزمان کے قبضے سے 3.030 کلوگرام منشیات برآمد کی گئی تھی۔

ترجمان اے این ایف کے مطابق ملزمان کو منشیات کی خرید و فروخت کے دوران رنگے ہاتھوں گرفتار کیا گیا، گرفتار ملزمان میں چاغی کے رہائشی راشد اور فضل الرحمن جبکہ سانگھڑ کا رہائشی محمد رفیق شامل ہیں۔