آسٹریلیا کے خلاف سیریز اور گیم پلان کے حوالے سے ہیڈ کوچ ثقلین مشتاق کا کہنا ہے کہ حریف کے خلاف کی جانے والی منصوبہ بندی کو افشا نہیں کرسکتے۔

تفصیلات کے مطابق آسٹریلیا کے خلاف قومی تربیتی کیمپ کے افتتاحی روز نیشنل اسٹیڈیم میں میڈیا سے گفتگو کرتے ہوئے ہیڈ کوچ ثقلین مشتاق نے کہا ہے کہ آسٹریلیا مسلسل بہترین کارکردگی کا مظاہرہ کر رہا ہے ، آسٹریلوی ٹیم نے انگلینڈ کے خلاف بھی شاندار کارکردگی کا مظاہرہ کیا ہے۔ ہم نے آسٹریلوی ٹیم کو سامنے رکھ کر اپنے  اہداف ترتیب دئیے ہیں۔ قومی ٹیم کو ہوم سیریز میں ماحول، موسم اور وکٹ کے ساتھ تماشائیوں کا بھی ایڈوانٹیج حاصل ہوگا۔

ان کا مزید کہنا تھا کہ  امید ہے کہ آسٹریلیا کے خلاف اچھی کرکٹ دیکھنے کو ملے گی، پی ایس ایل 7سے فارغ ہونے والے کھلاڑیوں کی آمد کے بعد مزید تربیت کے مواقع میسر آئیں گے۔

اس موقع پر ہیڈ کوچ کا کہنا تھا کہ پاکستان کی زمین بہت زرخیز ہے، اگر اس وقت پاکستان کے پاس اعلیٰ معیار کا لیگ اسپنر نہیں تو کوئی بات نہیں، ہمیں آگے چل کر اچھے اسپنرز ملنے کی توقع ہے۔

قومی کپتان بابر اعظم کو چاند سے تشبیہ دیتے ہوئے کہا کہ بابر اعظم ایک چاند کی مانند ہے، بلاشبہ بابراعظم اس وقت دنیا کا بہترین بیٹر ہے، اس کی پاکستان کے لیے بہترین خدمات ہیں، وہ ہر فارمیٹ کا بہترین کھلاڑی ہے۔

انھوں نے کہا کہ پورا پاکستان اس وقت کرکٹ کے ساتھ ہے، ہم آسٹریلیا کو کھلے دل کے ساتھ خوش آمدید کہتے ہیں اور آسٹریلیا بھی بے دھڑک ہو کر پاکستان آئے۔