صوبائی دارالحکومت لاہور شہر میں اسموگ کا راج برقرار ہے، اسموگ کے سبب شہریوں کو شدید مشکلات کا سامنا کر نا پڑ رہا ہے۔

تفصیلات کے مطابق فضائی آلودگی کےاعتبار سے پاکستان کا شہر لاہور آج دنیا کے آلودہ ترین شہروں میں پہلے نمبر پر ہے جس کے باعث شہر کے مختلف علاقوں کے منظر دھندلا گئے ہیں۔

ایئر کوالٹی انڈیکس کے مطابق لاہور کا انڈیکس228 جا پہنجا جبکہ دنیا کے آلودہ شہروں میں بھارت کا شہر دہلی کا ایئر کوالٹی انڈیکس 205 رہا۔

اس کے علاوہ تیسرے نمبر پر چین کا شہر ووہان ایئر کوالٹی انڈیکس 187 رہا جبکہ چوتھے نمبر پر بنگلا دیش کا شہر ڈھاکہ کا انڈیکس 183 رہا۔

ایئر کوالٹی انڈیکس کے مطابق پانچویں نمبر پر منگولیا کے شہر الانبتار کا انڈیکس 180 رہا ہے۔

ایئر کوالٹی انڈیکس کی درجہ بندی

ایئر کوالٹی انڈیکس کی درجہ بندی کے مطابق 151 سے 200 درجے تک آلودگی مضرِ صحت ہے۔

201 سے 300 درجے تک کی آلودگی انتہائی مضرِ صحت ہوتی ہے جبکہ 301 سے زائد درجہ خطرناک آلودگی کو ظاہر کرتا ہے

فضائی آلودگی

فضائی آلودگی ہوا میں موجود وہ مادے یا ذرات ہوتے ہیں جو کہ انسانی سرگرمیوں کی بدولت فضا کا حصہ بنتے ہیں۔

فضائی آلودگی گیسوں کی زیادتی، زہریلی گیسوں، تابکاری شعاعوں، کیمیائی مادوں، ٹھوس ذرات، مائع قطرات، گرد و غبار اور دھویں وغیرہ کی وجہ سے پیدا ہوتی ہے اور یہ انسانی صحت اور ماحول دونوں کو نقصان پہنچانے کا باعث بنتے ہیں۔