وزیر خارجہ مخدوم شاہ محمود قریشی نے کہا ہے کہ سندھ کے عوام 15سال سے ایک حکومت اور کرپشن تلے دبے ہوئے ہیں۔

سندھ حقوق مارچ ریلی میں شرکت کیلئے روانگی سے قبل وائس چیئرمین پاکستان تحریک انصاف  شاہ محمود قریشی نے اپنے جاری کردہ ویڈیو پیغام میں کہا کہ عوامی رابطہ مہم کے لیے گھوٹکی کے لیے روانہ ہورہا ہوں، سندھ کے عوام سے درخواست ہے کہ سوچنے کا وقت آگیا ہے۔

وزیر خارجہ نے کہا کہ سندھ کے عوام کو اپنے مستقبل کا فیصلہ کرنا ہے، یہ عوام 15سال سے ایک حکومت اورکرپشن تلے دبے ہوئے ہیں، امید ہے سندھ کا پسا ہوا طبقہ کرپشن کے خلاف سر اٹھائے گا۔

شاہ محمود کا کہنا ہے کہ سندھ کے عوام خودداری کا مظاہرہ کریں گے اور باہرنکلیں گے، وقت آگیا ہے غلامی کی زنجیریں توڑو اور اپنے مستقبل کے لیے بڑھو اور سندھ کے ساتھیوں پاکستان تحریک انصاف کے قافلے میں شامل ہونے کیلیے تیار ہوجاؤ۔

انہوں نے کہا کہ جس طرح بلاول پنجاب ائے اور عوامی مہم کا اغاز کیا اس طرح مجھے اور تحریک انصاف کو بھی حق پہنچتا ہے میں سندھ جاؤں، ہمارا بھی حق ہے جمہوری طریقے سے عوامی رابطہ مہم چلائیں امید ہے سندھ کی حکومت ہمارے قافلوں میں رکاوٹ نہیں ڈالے گی۔

مخدوم شاہ محمود قریشی نے مزید کہا کہ اگر ہمارے قافلوں میں رکاوٹ ڈالی تو پی ٹی آئی پنجاب کے کارکن یہ سب نوٹ کررہے ہوں گے، بلاول اپنا مؤقف پیش کریں اور ہمیں اپنا مؤقف پیش کرنے دیں۔