ہم دن بھر میں جو کچھ کھاتے ہیں اس کا ہماری صحت پر اثر ضرور پڑتا ہے لیکن ہم جو کچھ پیتے ہیں جیسے چائے، کافی سافٹ ڈرنک یا مشروبات ان کا بھی ہماری صحت کے اتار چڑھاؤ میں بھرپور کردار ہوتا ہے۔

سافٹ ڈرنک اور کیفین کا استعمال ہماری صحت کے لئے  نقصان دہ ثابت ہوتا ہے لیکن اگر ہم ان کی جگہ جڑی بوٹیوں سے بنے مشروبات کا استعمال شروع کر دیں تو یہ ہمارے لئے فائدے مند ثابت ہوگا اس لئے آج ہم آپ کو بتانے والے ہیں چند ایسی جڑی بوٹیوں کے بارے میں جو آپ کی قوتِ مدافعت بڑھا کر آپ کو صحت مند اور تندرست بنانے میں بھرپور کردار ادا کر سکتی ہیں۔

صحت مند رہنے کے لئے مختلف جڑی بوٹیوں کا استعمال

جڑی بوٹیوں سے بنے مشروبات ہمارے جسم میں پانی کی کمی کو دور کرتے ہیں اور ضروری غذائیت فراہم کرتے ہیں اور ہمارے جسم میں نمایاں تبدیلیوں کا سبب بنتے ہیں وہ کونسی جڑی بوٹیاں ہیں جن کے استعمال سے ہم قوتِ مدافعت میں اضافہ نظامِ انہضام میں بہتری، بے خوابی سے نجات، شوگر اور ہائی بلڈ پریشر جیسے امراض سے خود کو بچا سکتے ہیں آیئے جان لیتے ہیں۔

اسگندھ یا اشواگندھا

اشواگندھا ایک طاقتور جوان بنانے والی جڑی بوٹی ہے جو صدیوں سے گھریلو نسخوں میں مختلف بیماریوں کے علاج کے لیے اور ادویات تیار کرنے کے لیے استعمال ہوتی آرہی ہے، یہ جڑی بوٹی فعال مرکبات جیسے امینو ایسڈ، پیپٹائڈس ، لپڈس، اور نیوکلک ایسڈ سے بھرپور ہوتی ہے جو بنیادی طور پر قوت مدافعت بڑھانے کا کام کرتے ہیں، اشوگندھا سے بنے قہوے کو باقاعدگی سے استعمال کرنے سے آپ کو تناؤ، اضطراب، افسردگی اور خراب نیند کے مسائل سے نمٹنے میں مدد مل سکتی ہے۔

برہمی بوٹی

اشوا گندھا کی طرح برہمی بوٹی بھی گھریلو نسخوں میں اضطراب کے علاج اور ذہنی صحت کی حالت کو بہتر بنانے کے لیے استعمال کی جاتی ہے یہ جڑی بوٹی امیونوگلوبلین کی پیداوار بڑھا کر مدافعتی کام کو بڑھا سکتی ہے، اس میں موجود طاقتور اینٹی آکسیڈنٹس، دیگر دائمی حالات جیسے ذیابیطس اور کینسر کے علاج میں فائدہ مند ثابت ہو سکتے ہیں اس کا قہوہ بنا کر استعمال کرنا بےحد فائدے مند ہے۔

تخم بالنگا

یہ چھوٹے چھوٹے کالے بیج غذائیت سے بھرپور ہوتے ہیں جنہیں آپ کسی بھی مشروب میں ملا کر استعمال کر سکتے ہیں تخم بالنگا میں اومیگا 3 فیٹی ایسڈ، وٹامن  اے، بی، ای اور کے، کیلشیم، فاسفورس، میگنیشیم، آئرن، فلاوونائڈز اور فینولک ہوتے ہیں جو قوت مدافعت بڑھانے میں مدد دیتے ہیں اور فری ریڈیکلز سے ہونے والے نقصان کو روکتے ہیں، پانی میں تخم بالنگا گھول کر کچھ دیر چھوڑ دیں پھر اس میں لیموں شامل کر کے پی لیں۔

سونف

خوشبودار سونف کے بیجوں میں ٹرانس اینیتھول ہوتا ہے، یہ ایک ایسا مرکب ہے جو کئی قسم کے وائرس کو بے اثر کر سکتا ہے، سونف کے بیجوں کا پانی پینے سے قوت مدافعت بڑھتی ہے اور جسم میں سوجن کم ہوتی ہے، یہ انفیکشن کے خطرے کو بھی کم کر سکتا ہے اور سانس کی نالی صاف کرتا ہے، سونف وٹامن  اے، وٹامن سی اور بیٹا کیروٹین سے بھرپور ہوتی ہے، یہ اجزاء قوت مدافعت بڑھانے والی خصوصیات کے لیے مشہور ہیں سونف کا پانی وزن کم کرنے میں بھی اہم کردار ادا کرتا ہے۔