پنجاب پوليس کی جانب سے پتنگ بازوں کے خلاف کامیاب کارروائی کی گئی ہے۔

تفصیلات کے مطابق صوبہ پنجاب کے شہر گجرات میں پوليس سرکل نے پتنگ فروشوں اور پتنگ بازوں کے خلاف مختلف مقامات پر کارروائی کی، جس کے نتیجے میں 41 ملزمان گرفتار کر لیے گئے ہیں۔

ڈی پی او عمر سلامت  کا کہنا ہے کہ گرفتار ملزمان سے 1600 پتنگیں اور 35 کے قریب دھاتی ڈوریں برآمد کرلی گئی ہیں۔

انہوں نے مزید بتایا کہ گرفتار پتنگ بازوں اور پتنگ فروشوں کے خلاف سرکار کی مدعیت میں مقدمات بھی درج کرلیے گئے ہیں۔

واضح رہے کہ پتنگ بازی ایک انتہائی خطرناک کھیل ہے جس کی وجہ سے ہر سال کئی افراد جان سے ہاتھ دھو بیٹھتے ہیں، یہ صرف وہی لوگ نہیں ہوتے جو پتنگ بازی کا شوق پورا کرتے ہوئے جان کی بازی ہارتے ہیں۔

ہلاک ہونے والوں میں سے اکثر ایسے افراد ہوتے ہیں جنہیں پتنگ بازی کا کوئی شوق نہیں ہوتا نہ ہی وہ اس قاتل کھیل کا طریقہ جانتے ہیں بلکہ وہ ویسے ہی کسی آوارہ ڈور کی زد میں آ کر بے دردی سے جان دے دیتے ہیں یعنی پتنگ بازی ایک ایسا کھیل ہے جس میں کھلاڑی اپنا نقصان کم جبکہ دوسروں کا زیادہ نقصان کر دیتے ہیں۔

یہ نقصان ایسے ہوتے ہیں جن کا کبھی ازالہ نہیں ہو سکتا، پتنگ بازی کے نتیجے میں مالی نقصان شاید ہی کہیں ہوتا ہے اس میں اکثر و بیشتر جانی نقصان ہی ہوتا ہے۔