شاہ محمود قریشی نے کہا ہے کہ جرمنی پاکستان کا قابل قدراور دیرینہ شراکت دار ہے۔

جرمنی کی وزیر خارجہ اینالینا بیرباک نے وزیر خارجہ شاہ محمود قریشی کو ٹیلی فون کیا جس کے دوران دونوں وزراء نے دو طرفہ تعلقات کے ساتھ ساتھ اہم علاقائی امور پر تبادلہ خیال کیا۔

وزیر خارجہ نے اپنی جرمن ہم منصب کو بطور وزیر خارجہ ذمہ داریاں سنبھالنے پر مبارکباد دی۔

شاہ محمود قریشی نے کہا کہ جرمنی پاکستان کا قابل قدراور دیرینہ شراکت دار ہے، پاکستان جرمنی کیساتھ تمام جہتوں بالخصوص تجارت، سرمایہ کاری، توانائی اور موسمیاتی تبدیلی کے شعبوں میں دوطرفہ تعلقات کو مزید فروغ دینے کے لیے پرعزم ہے۔

وزیر خارجہ نے افغانستان میں امن و استحکام کیلئے عالمی برادری کی کوششوں کے ضمن میں پاکستان کی حمایت کے عزم کا اعادہ کیا اور افغانستان سے انخلاء کے عمل میں پاکستان کی جانب سے فراہم کردہ معاونت سے جرمن ہم منصب کو آگاہ کیا۔

 انہوں نے کہا کہ پاکستان نے اب تک 90 ہزار سے زائد افراد کو افغانستان سے محفوظ انخلاء میں سہولت فراہم کی ہے، افغانستان میں بڑھتے ہوئے انسانی بحران اور اقتصادی ابتری کا تدارک نہ کیا گیا تو اس کے شدید منفی اثرات مرتب ہوں گے۔

دونوں وزرائے خارجہ نے یوکرین کی صورتحال پر بھی تبادلہ خیال کیا۔

وزیر خارجہ نے جرمن ہم منصب کو بھارت کی جانب سے 5 اگست 2019 کی غیر قانونی، یکطرفہ کارروائی کے بعد انسانی حقوق کی سنگین خلاف ورزیوں سے آگاہ کیا۔

وزیر خارجہ اینالینا بیرباک نے افغانستان سے انخلاء کے عمل میں پاکستان کی مدد کو سراہا اور اس سلسلے میں پاکستان کی مسلسل حمایت کی توقع ظاہر کی۔

شاہ محمود قریشی نے جرمن وزیر خارجہ کو پاکستان کا دورہ کرنے کی دعوت دی۔

دونوں وزرائے خارجہ نے پاکستان اور جرمنی کے مابین دوطرفہ تعلقات کی نوعیت پر اطمینان کا اظہار کرتے ہوئے انہیں مزید بڑھانے کے عزم کا اظہار کیا۔