بالی ووڈ اداکار امیتابھ دیال کا آج صبح 4.30 بجے انتقال ہو گیا۔

غیر ملکی خبر رساں ادارے کے مطابق  اداکار 17 جنوری کو دل کا دورہ پڑنے کے بعد گزشتہ چند دنوں سے اسپتال میں زیر علاج تھے۔

ان کی اہلیہ مرنالینی پاٹل نے بتایا کہ ‘ان کا انتقال آج صبح 4.30 بجے ہوا۔ امیتابھ کو 17 جنوری کو دل کا دورہ پڑا تھا جس کے بعد انہیں ممبئی کے ناناوتی اسپتال میں داخل کرایا گیا تھا تاہم اسپتال میں جانچ کے دوران پتہ چلا کہ کورونا پازیٹو ہے۔ علاج کے بعد وہ کورونا سے صحت یاب ہو گئے لیکن ایک بار پھر دل کا دورہ پڑا جس کے بعد انہیں بچایا نہیں جا سکا۔

امیتابھ دیال نے 4 دن قبل اسپتال سے بنائی گئی اپنی ویڈیو اپنے انسٹاگرام پر پوسٹ کی تھی۔

امیتابھ اپنے ویڈیو میں کہہ رہے تھے کہ ‘ہیلو دوستو، آج آٹھواں دن ہے، کووڈ سے لڑتے ہوئے، لڑائی کرنا کبھی مت چھوڑیئے، کوئی  اپنے دفاع کے لیے لڑتا ہے کوئی اپنی ذات کی عزت کیلئے لڑتا ہے تاہم اب ہم کووڈ سے لڑ رہے ہیں اور ہمیں زندگی جینی ہے، اس لئے کبھی ہار مت مانئے جیسے میں نہیں مان رہا، میں آپ لوگوں سے روز ملوں گا۔

یاد رہے کہ امیتابھ کووڈ-19 میں مبتلا تھے، طویل عرصے سے اسپتال میں داخل تھے تاہم اداکارکورونا سے صحت یاب بھی ہو گئے تھے لیکن انہیں دوبارہ دل کا دورہ پڑا اور 61 سال کی عمر میں وہ اس دنیا سے رخصت ہو گئے۔

امیتابھ دیال کی موت کی خبر نے بالی ووڈ انڈسٹری کو غم زدہ کر دیا ہے۔

واضح رہے کہ اداکار امیتابھ نے اوم پوری نے فلم ‘کگار: لائف آن دی ایج’  میں کام کیا تھا۔