بلاول بھٹو زرداری نے کہا ہے کہ نوجوانوں کے ساتھ مل کر ہم ملک کے مستقبل کو بدلیں گے۔

پاکستان پیپلزپارٹی کے چیئرمین بلاول بھٹو زرداری نے سندھ میں طلبہ یونین کی بحالی پر ویڈیو پیغام میں کہا کہ میں پورے پاکستان کے نوجوانوں کو سندھ میں طلبہ یونین کی بحالی پر مبارک باد پیش کرتا ہوں۔

بلاول بھٹو نے کہا کہ آج سندھ اسمبلی نے طلبہ یونین بحالی کا بل منظور کرکے ایک تاریخ رقم کی ہے ، طلبا سے یونین سازی اور اپنے نمائندے کے چناؤ کا حق چھین کر نوجوانوں کی آواز کو دبانے کی کوشش کی گئی تھی۔

پاکستان پیپلزپارٹی کے چیئرمین کا کہنا تھا کہ اگر آج پاکستان میں تبدیلی کے نام پر تباہی ہے، اگر آج نئی نسل سیاسی تہذیب اور طریقہ کار سے ناواقف ہے تو اس کی وجہ نوجوان نسل کو سیاسی عمل سے دور کرنا تھا۔

انہوں نے کہا کہ پاکستان میں برادری، لسانیت، زبان، ذات اور مذہب کی بنیاد پر اگر سیاست ہورہی ہے تو اس کی وجہ بھی نوجوان نسل کوسیاسی عمل سے دور کرنا تھا۔

پاکستان پیپلزپارٹی کے چیئرمین نے کہا کہ طلبہ یونین وہ واحد طریقہ ہے کہ نوجوان سیاست اور نمائندگی کا طریقہ سیکھیں، جب طلبہ سے متعلق فیصلے کئے جاتے تھے تو نوجوان فیصلہ سازی کے ان فورمز پر اپنا مؤقف تک پیش نہیں کرسکتے تھے لیکن اب درس گاہوں میں طلبہ سے متعلق فیصلہ لینے والی انتظامیہ میں طلبا کا اپنا منتخب نمائندہ ہوگا۔

بلاول بھٹو زرداری نے یہ بھی کہا کہ سندھ کے نوجوانوں پر ایک بڑی ذمہ داری عائد ہوتی ہے، پورا پاکستان آپ کی جانب دیکھ رہا ہے کہ کیسے آپ طلبہ یونین کے حوالے سے اپنی ذمہ داریاں پوری کرتے ہیں۔

ان کا کہنا تھا کہ ہمارا مطالبہ ہے کہ ملک بھر میں طلبہ تنظیمیں بحال ہوں، میں امید کرتا ہوں کہ طلبہ ذمہ داری سے طلبہ یونین کے امور نبھائیں گے اور ایک مثال قائم کریں گے۔

پاکستان پیپلزپارٹی کے چیئرمین کا کہنا تھا کہ 27 فروری کو جب ہم کراچی سے نکل کر دوسرے صوبے میں داخل ہوں گے تو سندھ کی طرز پر ملک بھر میں طلبہ یونین کی بحالی کا مطالبہ کریں گے۔

انہوں نے کہا کہ میں طلباء سے اپیل کرتا ہوں کہ پاکستان پیپلزپارٹی کا ساتھ دیں تاکہ ہم ملک بھر میں طلبہ یونین کی بحالی کے دیرینہ مطالبے کے حل کی جدوجہد کرسکیں اور جب طلبہ کی اپنی نمائندگی ہوگی تو درس گاہوں میں مسائل کے حل کا طریقہ نکلے گا۔

بلاول بھٹو نے کہا کہ میں سندھ پیپلز اسٹوڈنٹ فیڈریشن، پاکستان اسٹوڈنٹ فیڈریشن سمیت تمام طلبا کی ایسوسی ایشنز جنہوں نے یونین کی بحالی کے لئے محنت کی، سب کو مبارک باد پیش کرتا ہوں۔

پاکستان پیپلزپارٹی کے چیئرمین بلاول بھٹو زرداری کا مزید کہنا تھا کہ میں آج فخر محسوس کررہا ہوں کہ قائد عوام اور شہید محترمہ بے نظیر بھٹو نے ملک کے نوجوانوں کے لئے جو خواب دیکھا تھا، ہمیں اس خواب کی تکمیل کا موقع ملا، انشاءاللہ مستقبل میں نوجوانوں کے ساتھ مل کر ہم ملک کے مستقبل کو بدلیں گے۔