سابق چیف جسٹس آف پاکستان جسٹس گلزار احمد کو ریٹائرمنٹ کے بعد بھی فول پروف سیکیورٹی دی جائے گی۔

ذرائع کے مطابق شابق چیف جسٹس گلزار احمد کو ریٹائرمنٹ کے بعد بھی گھر اور دوران سفر فول پروف سیکورٹی دی جائے گی۔

اس حوالے سے سابق چیف جسٹس گلزار احمد نے کی ریٹائرمنٹ سے قبل 27 جنوری کو رجسٹرار آفس کی جانب سے وزارت داخلہ کو ایک خط لکھا گیا جس میں بتایا گیا کہ جسٹس گلزار احمد نے اپنے عہدے کی مدت کے دوران بہت سے ہائی پروفائل آئینی، فوجداری، بنیادی حقوق، سرکلر ریلوے، سرکاری افسران اور اقلیتوں کے حقوق سے متعلق مقدمات سنے اور ان پر فیصلے کئے ہیں۔

خط میں مزید کہا گیا ہے کہ سپریم کورٹ قواعد شق نمبر 25 (1) کے مطابق چیف جسٹس کو ریٹائرمنٹ کے بعد بھی سیکیورٹی دی جاتی ہے۔

خط کے مطابق چیف جسٹس (ریٹائرڈ) گلزار احمد اور انکے اہلخانہ کی زندگی کو شدید خطرات لاحق ہیں اس لئے کسی بھی ناخوشگوار واقعہ سے بچنے کیلئے لازمی ہے کہ چیف جسٹس گلزار احمد اور انکے اہلخانہ کو ریٹائرمنٹ کے بعد بھی بطور چیف جسٹس پاکستان ملنے والی سیکورٹی (رینجرز، پولیس) فراہم کی جائے۔

 ذرائع کے مطابق رجسٹرار آفس کے خط پر وزارت داخلہ سے منظوری دی جا چکی ہے۔

دوسری جانب وفاقی وزیر شہباز گل بھی سابق چیف جسٹس جسٹس ریٹائرڈ گلزار احمد کی سیکیورٹی کے حق میں بول پڑے

انہوں نے کہا کہ جسٹس (ریٹائرڈ) گلزار احمد کافی بولڈ چیف جسٹس رہے ہیں، انہوں نے کافی اچھے اور بڑے فیصلے دیے ہیں، تجاوزات کے خلاف آپریشن اور اقلیتوں کے حقوق سے متعلق فیصلے دیے گئے۔

جسٹس ریٹائرڈ گلزار احمد سمیت تمام ججز محترم ہیں، انہیں سیکیورٹی ملنی چاہیے، یہ بھی کہا کہ رانا ثنا اللہ نے بیان دیا شہباز شریف کو سزا دینے والے ججز کا گھیراوٗ کریں گے، ججز یا عدلیہ کو دھمکانے والے رویے برداشت نہیں کریں گے۔