امریکی سائنسدانوں کا کہنا ہے کہ بھرپور نیند لینے سے موٹاپا کم کرنے میں مدد ملتی ہے کیونکہ اس کے باعث ہمیں کم کیلوریز کی ضرورت پڑتی ہے۔

زیادہ تر ہم نے یہی بات سُنی ہے کہ زیادہ سونا موٹاپے کا باعث بنتا ہے یا کم سونا بھی موٹاپے کا باعث بنتا ہے لیکن امریکہ کی یونیورسٹی آف شکاگو میں کی گئی اس نئی تحقیق میں یہ بات سامنے آئی ہے کہ زیادہ سونا اور پوری نیند لینا موٹاپے کو کم کرنے میں مدد دے سکتا ہے۔

یونیورسٹی آف شکاگو میں اس تحقیق کے دوران 25 سے 35 سال کے صحت مند رضاکار شریک کیے گئے جن میں سے نصف کو دو ہفتے تک معمول سے ایک گھنٹہ 12 منٹ زیادہ سلایا گیا۔

یعنی اگر وہ رات میں 8 گھنٹے کی گہری نیند لے رہے تھے تو مختلف طریقوں کی مدد سے یہ دورانیہ بڑھا کر 9 گھنٹے 12 منٹ کردیا گیا۔

یہ تجربہ دو ہفتے تک کیا گیا جس دوران رضاکاروں میں نیند کے دورانیے، سونے جاگنے کے معمولات اور توانائی کی روزمرہ ضروریات پر نظر رکھی گئی۔

اس تحقیق میں یہ معلوم ہوا کہ معمول سے زیادہ لیکن پرسکون اور معیاری نیند لینے والے رضاکاروں کی بھوک کم ہوئی، ہاضمہ بہتر ہوا جبکہ حیرت انگیز طور پر اضافی ورزش یا جسمانی مشقت کے بغیر ان کا وزن بھی قابو میں رہا۔

اس تحقیق سے پتہ چلا کہ نیند میں اوسطاً ایک گھنٹے کے اضافے سے رضاکاروں میں غذائی توانائی کی یومیہ ضرورت میں لگ بھگ 400 کیلوریز کی کمی واقع ہوئی۔

اس تحقیق کی مرکزی مصنفہ ڈاکٹر اسریٰ تصالی کنے بتایا کہ حالیہ برسوں میں جہاں مختلف تحقیقات میں یہ معلوم ہوا کہ نیند متاثر ہونے سے بھوک بڑھتی ہے اور موٹاپے کے خطرے میں اضافہ ہوتا ہے۔

 وہیں لوگوں کی جانب سے یہ سوال بھی سامنے آیا کہ کیا معمول سے ایک گھنٹہ زیادہ کی پرسکون نیند، موٹاپا کم کرنے میں ہماری کوئی مدد کرسکتی ہے یا نہیں؟

امریکا میں طبّی آزمائش کے طور پر رجسٹرڈ کروائی گئی اس تحقیق کے نتائج ’’جاما انٹرنل میڈیسن‘‘ کے تازہ شمارے میں شائع ہوئے ہیں جو ظاہر کرتے ہیں کہ موٹاپا کم کرنے میں اچھی اور طویل نیند کا کردار بےحد اہم ہوسکتا ہے۔

اس تحقیق کے نتائج فربہ افراد کے لئے امید کی کرن ضرور ہیں لیکن محدود افراد پر کی گئی تحقیق کی بناء پر فی الحال انہیں حتمی قرار نہیں دیا جاسکتا۔

تاہم یہ حقیقت ہے کہ نیند کی کمی بھوک میں اضافے کا چاعث بنتی ہے اس لئے پوری نیند لینا اچھی صحت اور وزن میں کمی کے لئے بےحد اہم ہے۔