ہانگ کانگ کی انتظامیہ نے اعلان کیا ہے کہ وہ اگلے ماہ پورے ہانگ کانگ کے تمام شہریوں کا دوبارہ کورونا ٹیسٹ کرے گی۔

منتظم اعلیٰ کیری لیم نے منگل کے روز نامہ نگاروں کو بتایا کہ تقریباً تمام 74 لاکھ باشندوں کو تین بار ٹیسٹ کروانا ہوگا۔

انہوں نے کہا کہ ہانگ کانگ کے حکام کا منصوبہ ہے کہ مرکزی چین کے تعاون سے یومیہ دس لاکھ تک ٹیسٹ کیے جائیں گے اور متاثرہ افراد کے علاج کے لیے عارضی سہولیات بنائی جائیں گی۔

جم اور سینما گھروں جیسے کاروباروں کی بندش، تین یا زائد افراد کے جمع ہونے کی ممانعت اور ریستورانوں میں رات کے وقت کھانے پر پابندی میں اپریل کے اواخر تک توسیع کی جائے گی۔

گرمیوں کی چھٹیاں وقت سے پہلے کرتے ہوئے اسکولوں کو مارچ سے اپریل کے اواخر تک بند رکھا جائے گا۔ہانگ کانگ خطے میں کورونا وائرس متاثرین کی تعداد میں اضافہ ہو رہا ہے اور یومیہ نئے متاثرین کی تعداد 6 ہزار سے تجاوز کر چکی ہے۔

چین، اپنی صفر کووڈ پالیسی کے باعث چوکنا ہے۔ اطلاعات کے مطابق، گزشتہ ہفتے صدر شی جن پنگ نے ہانگ کانگ کی حکومت کو ہر ممکن اقدام کرنے کی ہدایت کی تھی۔

ہانگ کانگ میں مارچ میں ہونے والے منتظم اعلیٰ کے انتخابات بھی مئی تک مؤخر کر دیے گئے ہیں۔