جنوبی کوریا کےباشندوں میں پاکستانیوں جیسی کچھ عادات بھی شامل ہیں یعنی تقاریب پر ساؤنڈ سسٹم کا شور کیا جاتا ہے لیکن اگر پڑوسی نہ سنیں تو اب کوریا والے اس کے لیے اپنے گھروں میں جوابی اسپیکر نصب کررہے ہیں جو جیسے کو تیسا کی طرح ایک جواب ہوسکتا ہے۔

اپارٹمنٹ اور بلڈنگوں میں شور کم نہ کرنے والے ڈھیٹ پڑوسیوں کو شور سنانے والے گھریلو اسپیکرپہلی مرتبہ 2016 میں منظرِ عام پرآئے تھے لیکن اب وہ تیزی سے مقبول ہورہے ہیں۔ شاید اس کی وجہ ہے کہ لوگوں نے کووڈ وبا میں محصور ہوکر زیادہ شورکرنا شروع کردیا ہے۔ اس ضمن میں چھتوں اور دیواروں پر نصب کئے جانے والے بہت سے ماڈل تیزی سے مقبول ہورہے ہیں۔

تیز شوروالے سسٹم کو ایک مؤثر ہتھیار بھی کہا جارہا ہے۔ یعنی اگر کسی وجہ سے شوروغل پیدا کرنے والا پڑوسی باز نہیں آرہا تو اس کے جواب میں یہ سسٹم چلائے۔ اگر پڑوسی کا گھر اگلے دروازے پر ہے یا ایک منزل اوپر تب بھی وہ اس سے متاثر ضرور ہوگا۔

کوریا میں انہیں انتقامی ساؤنڈ سسٹم بھی کہا جاتا ہے۔ بعض اسپیکروں کا ڈیزائن کچھ ایسا ہے کہ اس کا رخ پڑوسی کے گھر کی جانب کردیں باقی آواز سے دھمکانے کا کام یہ خود کرلے گا۔

ان میں سے بیضوی شکل کا اسپیکر بہت مقبول ہے جو تنصیب میں سادہ اور استعمال میں آسان ہے اور اس کی قیمت بھی 150 ڈالر کے لگ بھگ ہے۔ تاہم حکومت نے عوام الناس پر زور دیا ہے کہ وہ اس طرح کے معاملات بات چیت اور فراست سے حل کرنے کی کوشش ضرور کریں۔ حکومت کے مطابق تیز آواز کے ساؤنڈ سسٹم قابلِ گرفت جرم نہیں اور اسی وجہ سے لوگوں نے صوتی بدمعاشی کا علاج اپنے ہاتھ میں لے لیا ہے۔