این سی او سی نے 10 فیصد سے کم شرح والے شہروں میں ایس او پیز پر نرمی کا فیصلہ کیا ہے۔

نیشنل کمانڈ اینڈ کنٹرول سینٹر(این سی او سی) کا اہم اجلاس ہوا جس میں مختلف سیکٹرز میں نافذ شدہ نان فارماسیوٹیکل انٹروینشنز (این پی آئیز) کا تفصیلی جائزہ لیا گیا۔

این سی او سی کے خصوصی اجلاس میں 10 فیصد سے کم شرح والے شہروں میں ایس او پیز پر نرمی کا فیصلہ کیا ہے جبکہ مظفر آباد، پشاور، حیدر آباد، گلگت، مردان اور کراچی میں ایس او پیز میں ردوبدل نہ کرنے کا فیصلہ کیا ہے۔

اجلاس میں فیصلہ کیا گیا ہے کہ دس فیصد سے زائد شرح والے شہروں میں پابندیاں برقرار رکھی جائیں گی، انڈور اجتماع پر پابندی جبکہ آؤٹ ڈور 300 افراد کی اجازت ہوگی۔

این سی او سی کے خصوصی اجلاس میں فیصلہ کیا گیا ہے کہ انڈور شادی تقریبات پر پابندی جبکہ آؤٹ ڈور 300 افراد کی اجازت ہوگی۔

واضح رہے کہ پاکستان میں عالمی وبا کورونا وائرس سے مزید 27 افراد جاں بحق ہو گئے جس کے بعد اموات کی مجموعی تعداد 29 ہزار 828 ہو گئی۔

نیشنل کمانڈ اینڈ آپریشن سینٹر (این سی او سی) کی جانب سے جاری کردہ تازہ اعدادو شمار کے مطابق گزشتہ 24 گھنٹوں کے دوران ملک بھر میں مزید 2 ہزار 597کورونا کیسز رپورٹ ہوئے۔ ملک میں کورونا کیسز کی مجموعی تعداد 14 لاکھ 88 ہزار 958 ہو گئی۔

این سی او سی کے مطابق گزشتہ چوبیس گھنٹوں میں ملک بھر میں48 ہزار 37 کورونا ٹیسٹ کیے گئے اور مثبت کیسز کی شرح 5.40 فیصد پر پہنچ گئی۔

سندھ میں کورونا کے کیسز کی تعداد 5 لاکھ 60 ہزار36، خیبر پختونخوا میں 2 لاکھ 11ہزار112، پنجاب میں 4 لاکھ 96 ہزار 134، اسلام آباد میں ایک لاکھ 33 ہزار277، بلوچستان میں 35 ہزار 111، آزاد کشمیر میں 42 ہزار 42اور گلگت بلتستان میں 11 ہزار 246 ہو گئی ہے۔

کورونا کے سبب سب سے زیادہ اموات پنجاب میں ہوئی ہیں جہاں 13 ہزار 380 افراد جان کی بازی ہار چکے ہیں جبکہ سندھ میں 7 ہزار 985، خیبر پختونخوا 6 ہزار 133، اسلام آباد 999، گلگت بلتستان 189، بلوچستان میں 371 اور آزاد کشمیر میں 771 افراد جان کی بازی ہار چکے ہیں