تحریک انصاف لیبر ونگ کی مرکزی تنظیم کا ڈھانچہ تشکیل دے دیا گیا ہے۔

تفصیلات کے مطابق رانا عبدالسمیع پاکستان تحریک انصاف لیبر ونگ کے صدر مقرر ہوئے ہیں جبکہ گل نمروز پاکستان تحریک انصاف لیبر ونگ کے مرکزی جنرل سیکرٹری کے فرائض سرانجام دیں گے۔

عبدالصبور شاہ مرکزی سینئر نائب صدر جبکہ عبدالرشید کاکڑ کو مرکزی نائب صدر کی ذمہ داریاں سونپ دی گئیں۔

مرکزی سیکرٹری جنرل پاکستان تحریک انصاف و وفاقی وزیر منصوبہ بندی اسد عمر نے باضابطہ نوٹیفکیشن جاری کر دیا ہے اور لیبر ونگ کے نئے ذمہ داران کیلئے نیک تمناؤں اور خواہشات کا اظہار بھی کیا ہے۔

مرکزی سیکرٹری جنرل و وزیر منصوبہ بندی اسد عمر نے کہا کہ فلاحی ریاست کی تشکیل کے سفر میں محنت کش اور مزدور طبقہ عمران خان کے شانہ بشانہ ہے، ملکی معیشت کا پہیہ رواں رکھنے کیلئے ہمارا جفاکش محنت کش اپنا پسینہ بہاتا ہے۔

انہوں نے کہا کہ پہلی حکومتوں کے ہاتھوں معیشت کی تباہی کا سب سے زیادہ خمیازہ محنت کش طبقے نے بھگتا، آج الحمدللہ معیشت افزائش و نمو کی راہ پر گامزن ہے تو ہمارا محنت کش اس کے ثمرات سے فیض یاب ہورہا ہے۔

وزیر منصوبہ بندی اسد عمر نے کہا کہ سیاسی شعور کا حامل ہمارا محنت کش حزب مخالف کی سازشوں پر گڑی نظر رکھے ہوئے ہے، ہمارے مزدور کا فیصلہ ہے کہ اپنی چوری بچانے اور انتخابی شکست کا بدلہ عوام سے لینے کی کسی تحریک کو رستہ نہیں دیں گے۔

اسد عمر نے کہا کہ تحریک انصاف نے اپنے مزدور کو توانا سیاسی پلیٹ فارم مہیا کیا ہے، وزیراعظم کی قیادت میں تحریک انصاف کی حکومت نے کورونا کے انسداد کی پوری حکمت عملی اپنے محنت کش طبقے کو سامنے رکھ کر مرتب کی۔

انہوں نے کہا کہ وباء کے دوران معقول اجرت کی فراہمی کا تسلسل برقرار رکھنے کیلئے اربوں روپے کے خصوصی پیکجز دیے گئے، وباء کے دوران محنت کش طبقے کے روزگار کے تحفظ کیلئے بھی حکومت نے مؤثر اقدامات اٹھائے۔

وزیر منصوبہ بندی اسد عمر نے کہا کہ وزیراعظم کی خصوصی اپیل پر صفِ اوّل کے کاروباری ادارے محنت کش ملازمین کو اپنے منافع میں شریک کررہے ہیں، اپنے مزدور طبقے کی فلاح و بہبود کے حوالے سے طے شدہ اہداف کے حصول پر محنت کا سلسلہ جاری رکھیں گے۔