بھارت کے کھلاڑی وردھیمان ساہا نے ایک سینئیر بھارتی صحافی پر الزام عائد کیا ہے کہ انہوں نے فون پر بُرا بھلا کہا، اور دھمکیاں بھی دی۔

بھارت کی ٹیم میں حالیہ ویسٹ انڈیز کے خلاف سیریز میں منتخب نہ ہونے والے 37 سالہ وکٹ کیپر نے سماجی رابطے کی ویب سائٹ پر لکھا کہ ایک سینئیر صحافی نے ان سے انٹرویو لینے کا کہا ، میں نے انہیں منع کیا تو انہوں نے مجھے برا بھلا کہا۔ اور دھمکیاں بھی دیں۔

کھلاڑی وردھیمان ساہا کے اس الزام پر بی سی سی آئی نے تفتیش کا عندیہ دیا ہے اور بہت جلد وردھیمان کا بیان بھی لیا جائے گا۔

بھارتی میڈیا کے مطابق وردھیمان کے اس بیان پر کرکٹ بورڈ کے علاوہ سابق کھلاڑی بھی ان کے حق میں سامنے آ گئے ہیں۔

سابق ہیڈ کوچ روی شاستری اور سابق کھلاڑی وریندر سہواگ سمیت ہربھجن سنگھ نے جواب میں وردھیمان ساہا کو کہا ہے کہ وہ صحافی کا نام بتائیں۔

بھارتی کرکٹ بورڈ بی سی سی آئی کے سیکریٹری جے شاہ نے کہا کہ ہم وردھیمان ساہا نے جو کچھ کہا ہے اس کے بارے میں ان سے پوچھا جائے گا۔

جے شاہ نے کہا کھلاڑی سے پوچھا جائے کہ اصل واقعہ کیا ہوا تھا، ہم صحافی کی جانب سے دی جانے والی دھمکی اور اس کے پس منظر کی تفصیلات کی معلومات حاصل کرنا چاہتے ہیں۔