وزیراعلیٰ پنجاب سردار عثمان بزدار کا کہنا ہے کہ اراکین اسمبلی میرے دست و بازوہیں۔

وزیراعلیٰ پنجاب سردار عثمان بزدار سے رکن پنجاب اسمبلی بلال اصغر وڑائچ کی ملاقات ہوئی ہے، ملاقات میں بلال اصغر وڑائچ نے وزیراعلیٰ عثمان بزدار کو حلقے کے مسائل سے آگاہ کیا ہے۔

عثمان بزدار نے مسائل ترجیحی بنیادوں پر حل کرنے کی یقین دہانی کراتے ہوئے کہا کہ اراکین اسمبلی میرے دست و بازوہیں۔

وزیراعلیٰ پنجاب عثمان بزدار نے کہا کہ ان کے حلقوں کے مسائل پہلے بھی حل کیے، آئندہ بھی کریں گے۔

عثمان بزدار کا کہنا تھا کہ منتخب نمائندوں کے جائزکام ہر صورت ہوں گے کیونکہ ہم نے مل کر عوام کی خدمت کرنی ہے۔

 وزیراعلیٰ پنجاب نے کہا کہ وزیراعظم عمران خان کی قیادت میں ترقی کا سفر جاری رہے گا، اپوزیشن کی جانب سے سیاسی انتشار پیدا کرنے کی ہر کوشش ناکام رہی ہے۔

عثمان بزدار کا کہنا تھا کہ ترقی مخالف عناصرپراپیگنڈا کے ذریعے عوام کو گمراہ نہیں کرسکتے، پنجاب میں کسی کے خلاف انتقامی کارروائی نہ کی ہے اور نہ ہوگی۔

عثمان بزدار نے کہا کہ اپوزیشن ڈینگی اور کورونا کے دوران بھی سیاست چمکانے کی کوشش کرتی رہی، اپوزیشن کے خلاف خود عدم اعتماد ہو چکا ہے اور ان کی منفی سیاست اب”قرنطینہ“ میں چلی گئی ہے۔

وزیراعلیٰ پنجاب نے کہا کہ اپوزیشن رہنماؤں نے منفی عمل سے ثابت کیا ہے کہ ان کے سینے میں دل ہے نہ دکھی انسانیت کی خدمت کا جذبہ ہے۔

انہوں نے مزید کہا کہ موجودہ حالات میں سیاسی عدم استحکام پیدا کرنے کی کوشش کرنیوالوں کو قوم کبھی معاف نہیں کریگی۔