لڑکے اور لڑکیاں 16 سال کی عمر میں نکلنے والے دانوں سے نجات کی تلاش میں رہتے ہیں، اگرچہ یہ دانے ختم بھی ہو جائیں تو ان کے ضدی نشانات پیچھا نہیں چھوڑتے۔

لڑکے اور لڑکیوں میں بالغ ہونے کے بعد ہارمونل تبدیلیوں کی وجہ سے دانے نکلنا ایک عام بات ہے، لیکن یہ دانے اور دھبے چہرے کی خوبصورتی کو متاثر کرتے ہیں اس لئے ان سے جان چھڑانا بےحد ضروری ہے۔

مختلف کریموں کی مدد سے دانے وقتی طور پر تو ختم ہو جاتے ہیں مگر کیمیکل والی ان کریموں کی وجہ سے یہ دوبارہ اُبھر آتے ہیں۔

ہمارے بتائے ہوئے چند گھریلو نسخے آزما کر آپ ان دانوں اور دھبوں سے نجات حاصل کر سکتے ہیں۔

دانے اور داغ دھبے دور کرنے کے لئے نسخے

دودھ  

دودھ جہاں پینے پر ڈھیروں فوائد کا حامل ہوتا ہے وہیں داغ دھبے دور کرنے اور جلد کی رنگت نکھارنے کے لئے بھی بہت مفید ہے صبح کچے دودھ سے چہرے پر 5 سے 8 منٹ اچھی طرح مساج کرکے منہ دھو لیں بہت جلد چہرے سے داغ دھبے دور ہو جائیں گے۔

آلو

چہرے پر آلو کے حیرت انگیز فوائد کو ہرگز نظرانداز نہیں کیا جا سکتا، کیونکہ کچے آلو کے اندر ایک انزائم موجود ہوتا ہے جس کا نام کیٹیچولیس ہے یہ چہرے کی جلد کے نیچے میلانن کی تیاری کے عمل کو روکتا ہے اس ہی میلانن کی زیادہ مقدار کی وجہ سے درحقیقت چہرے پر داغ دھبے بنتے ہیں، اس کے لئے آلو کے رس کو چہرے پر لگائیں اس سے چہرے پر موجود داغ دھبے دور ہوں گے اور جلد چمکدار ہوگی۔

لیموں 

لیموں میل کاٹنے کے لئے جانا جاتا ہے اس میں بلیچنگ خصوصیات ہوتی ہیں، جو کہ سورج کی الٹرا وائلٹ شعاعوں کے سبب ہونے والے جلد کے نقصان کو دور کر سکتی  ہیں چہرے پر لیموں کے استعمال سے جلد کی قدرتی رنگت میں نکھار آتا ہے ساتھ ہی داغ دھبے بھی دور ہوتے ہیں اس کے لئے کبھی لیموں کا براہِ راست جلد پر استعمال نہ کریں، بلکہ ٹماٹر کے گودے میں لیموں کا رس ملا کر اس سے چہرے کا مساج کریں اور اسے لگا کر کچھ دیر چھوڑ دیں پھر منہ دھو لیں۔

کھیرے

کھیرا ڈیڈ اسکن سیلز کا خاتمہ کرتا ہے جس کی وجہ سے جلد کو ایک تازگی ملتی ہے اور داغ دھبے دور ہو جاتے ہیں کھیرے کا رس نکال کر چہرے پر لگائیں اور اسے اپنی غذا میں بھی شامل کریں، کھیرے کو کاٹ کر چہرے پر ملنے سے بھی فائدہ ہوگا۔