خسرو بختیار نے کہا ہے کہ وفاقی حکومت ملک بھر میں ایس ایم ایز زونز کی ترقی کے لئے تمام صوبائی حکومتوں کی مدد کرے گی۔

وفاقی وزیر برائے صنعت و پیداوار مخدوم خسرو بختیار کی زیر صدارت اجلاس ہوا یہ ایس ایم ای ڈویلپمنٹ سے متعلق نیشنل کوآرڈینیشن کمیٹی کا پری اجلاس تھا۔

اجلاس میں پنجاب کے وزیر خزانہ مخدوم ہاشم جواں بخت، چیف سیکرٹری پنجاب کامران افضل، سی ای او سمیڈا ہاشم رضا اور پنجاب کے متعلقہ صوبائی سیکرٹریز نے شرکت کی۔

وفاقی سیکرٹری صنعت و پیداوار اور وزارت کے سینئر افسران ویڈیو لنک کے ذریعے شامل ہوئے۔

اجلاس میں چھوٹے اور درمیانے کاروباروں کو زمین کی الاٹمنٹ سے متعلق منصوبے پر تبادلہ خیال کیا گیا۔

خسرو بختیار نے کہا کہ حکومت نے موجودہ انڈسٹریل اسٹیٹس میں ایس ایم ایز کے لئے 4200 ایکڑ اراضی پلگ اینڈ پلے کی بنیاد پر مختص کی تھی ، صوبائی حکومتوں کے تعاون سے ایس ایم ایز کے لئے انفراسٹرکچر کی فراہمی کی جارہی ہے۔

وفاقی وزیر نے سیکریٹری صنعت و پیداوار اور سمیڈا کو متعلقہ حکام کے ساتھ مل کر کام کرنے کے لئے قابل عمل ماڈل وضع کرنے کی ہدایت دی۔

انہوں نے کہا کہ لاگت کم کرنے کیلئے زمین کے لیز ماڈل کی بنیاد پر ایس ایم ای انڈسٹریل اسٹیٹس قائم کیے جائیں ، وفاقی حکومت ملک بھر میں ایس ایم ایز زونز کی ترقی کے لئے تمام صوبائی حکومتوں کی مدد کرے گی۔