اقوام متحدہ کی جنرل اسمبلی میں روسی حملے میں جاں بحق افراد کے لئے ایک منٹ کی خاموشی اختیار کی گئی۔

جنرل اسمبلی کا یہ غیر معمولی اجلاس روس اور یوکرین میں جاری جنگ کو فوری طور پر روکنے کے لئے بلایا گیا تھا۔

اقوام متحدہ کی جنرل اسمبلی کے صدر عبداللہ شاہد نے ’فوری جنگ بندی‘ کا مطالبہ کرنے سے پہلے جنگ میں جاں بحق افراد کے لئے ایک منٹ کی خاموشی اختیار کرنے کا کہا جس کی تمام 193 رکن ممالک نے تائید کی۔

اقوام متحدہ کی تاریخ میں غیر معمولی اجلاس کا یہ سیشن 11 ویں مرتبہ ہوا ہے، اس اجلاس سے روس کو یہ بھی معلوم ہو جائے گا کہ عالمی برادری میں کون اس کے موقف کا حامی ہے۔

اقوام متحدہ کے سیکریٹری جنرل انتونیو گٹرز نے اجلاس کے افتتاح کے موقع پر کہا کہ ’یوکرین میں جاری جنگ کو فوری طورپر روکا جائے‘۔

سیکریٹری جنرل کا کہنا تھا کہ اب بہت ہو چکا ہے، فوجیوں کو اپنی بیرکوں میں جانے کی ضرورت ہے اور دونوں ملکوں کے سربراہان امن کی جانب پیش قدمی کریں اور شہریوں کی حفاظت کو یقینی بنایا جائے۔

سیکریٹری جنرل انتونیو نے روس سے درخواست کی کہ جوہری ہتھیاروں کے استعمال کا جواز کوئی بھی چیز نہیں بن سکتی، ابھی بندوقوں کے ذریعے بات ہو رہی ہے، لیکن بات چیت کا راستہ ہمیشہ کھلا رہنا چاہیئے۔