آرمی چیف جنرل قمر جاوید باجوہ نے کہا ہے کہ ہم ہر قیمت پر دہشت گردوں اور ان کے حامیوں کو ختم کریں گے۔

پاک فوج کے شعبہ تعلقات عامہ ( آئی ایس پی آر ) کے مطابق جی ایچ کیو میں پاک فوج کی 247ویں کورز کمانڈرز کانفرنس کا انعقاد ہوا جس کی صدارت آرمی چیف جنرل قمر جاوید باجوہ نے کی۔

آئی ایس پی آر کا کہنا ہے کہ کورز کمانڈرز کانفرنس شرکاء کو ملک کی مجموعی سیکیورٹی صورتحال پر بریفنگ دی گئی ، شرکاء کو بلوچستان کے حالیہ واقعات پر خاص طور پر بریف کیا گیا۔

پاک فوج کے ترجمان کا کہنا ہے کہ پاکستان کو غیر مستحکم کرنے کی دشمن کی کوششیں ناکام بنانے کے اقدامات سے شرکاء کو آگاہ کیا گیا ، بلوچستان میں دہشت گرد حملے ناکام بنانے کے دوران مادر وطن پر جان نچھاور کرنے والے شہداء کو زبردست خراج تحسین پیش کیا گیا۔

آئی ایس پی آر کا کہنا ہے کہ آرمی چیف نے فارمیشنز کی آپریشنل تیاریوں پر اظہار اطمینان کیا۔

آرمی چیف جنرل قمر جاوید باجوہ نے کہا ہے کہ قوم کی حمایت سے دہشت گردی کے خلاف ہماری جنگ میں طویل سفر طے کر کے یہاں تک پہنچے ہیں ، مسلح افواج نے قوم کی حمایت سے ہر رنگ و نسل کے دہشت گردوں کے خلاف کامیاب آپریشنز کیے۔

آرمی چیف جنرل قمر جاوید باجوہ نے مزید کہا کہ دہشت گردوں کی اپنی بحالی کی کوششوں کو کامیاب نہیں ہونے دیں گے ، ہم ہر قیمت پر باقی ماندہ دہشت گردوں اور ان کے حامیوں کو ختم کریں گے۔