صدر آزاد جموں و کشمیر نے کہا ہے کہ مقبوضہ کشمیر میں بھارت کی جانب سے ریاستی دہشتگردی عروج پر ہے۔

صدر ریاست آزادجموں کشمیر بیرسٹر سلطان محمود چوہدری سے وفاقی وزیر منصوبہ بندی و مرکزی سیکریٹری جنرل پاکستان تحریک انصاف اسدعمر کی ایوان صدرکشمیر ہاؤس اسلام آباد میں اہم اور تفصیلی ملاقات ہوئی۔

ملاقات میں آزادکشمیر کی سیاسی صورتحال پرتفصیلی گفتگو کی گئی جبکہ باہمی دلچسپی سمیت دیگر امور پر بھی تبادلہ خیال کیا گیا۔

اس موقع پر اپنے خطاب میں صدر آزاد جموں و کشمیر بیرسٹر سلطان محمود چوہدری نے کہا کہ وکلاء ہمیشہ ہر تحریک میں شریک ہوتے ہیں اور انہیں اس کشمیر ریلی میں بھی بڑھ چڑھ کر حصہ لینا چاہیے۔

انہوں نے کہا کہ یہ کشمیر ریلی 24فروری کو نیشنل پریس کلب اسلام آباد سے شروع ہو کر ڈی چوک پر ختم ہو گی جہاں آزادی کے بیس کیمپ کی تمام سیاسی جماعتوں کے قائدین مختصر خطاب کریں گے اور اس ریلی کا انعقاد 30جنوری کو کشمیر ہاؤس میں منعقد کی جانے آل پاریٹیز کشمیر کانفرنس کے فیصلوں کی روشنی میں کیا جا رہا ہے۔

صدر آزاد جموں و کشمیر کا کہنا تھا کہ بھارت نے 5اگست 2019 کے بعد مقبوضہ کشمیر میں ایسے اقدامات اٹھانے شروع کر دیئے ہیں جن سے وہ مسئلہ کشمیر کو ختم کرنا چاہتا ہے اور مقبوضہ کشمیر کو ہڑپ کرنے کی سازش کر رہا ہے۔

سلطان محمود چوہدری نے کہا کہ بھارت نے مقبوضہ کشمیر کی ڈیموگرافی تبدیل کرنے کے لیے 42 لاکھ غیر ریاستی ہندوؤں کو جعلی ڈومیسائل جاری کئے ہیں اور اس سلسلے میں 4ہزار سے زائد ہندوؤں کو کاروبار کے لیے زمین مہیا کی جا رہی ہے۔

انہوں نے یہ بھی کہا کہ مقبوضہ کشمیر کی اس سنگین صورتحال میں میں نے آل پارٹیز کشمیر کانفرنس بلائی جس میں اہم فیصلہ جات کیئے گئے جن کے مطابق پہلے مرحلے میں 24فروری کو صبح 11:00بجے اسلام آباد میں نیشنل پریس کلب سے ڈی چوک تک کشمیر ریلی کا انعقاد کیا جائے گا۔

سلطان محمود چوہدری کا کہنا تھا کہ میں آپ لوگوں سے بھرپور اپیل کرتا ہوں کہ اس میں بڑھ چڑھ کر شرکت کریں تاکہ ہم یہ ثابت کر سکیں کہ ہم مقبوضہ کشمیر کی عوام کے ساتھ ہیں اور عالمی برادری اور انٹرنیشنل میڈیا کی توجہ مسئلہ کشمیر کی جانب مبذول کروائی جاسکے۔

صدر آزاد جموں و کشمیر بیرسٹر سلطان محمود چوہدری کا مزید کہنا تھا کہ مقبوضہ کشمیر میں بھارت کی جانب سے ریاستی دہشتگردی عروج پر ہے، نوجوانوں کو شہید کیا جا رہا ہے، خواتین کی عصمت دری کی جا رہی ہے جبکہ پیلٹ گن کے استعمال سے بچوں اور خواتین کی بینائی چھینی جا رہی ہے لہذا ایسی صورتحال میں ہم سب کی یہ ملی اور قومی ذمہ داری بنتی ہے کہ ہم مقبوضہ کشمیر کی عوام کے ساتھ یکجہتی کا اظہار کرتے ہوئے کشمیر ریلی میں بڑھ چڑھ کا حصہ لیں لہذا آپ سب لوگ 24 فروری کو اسلام آباد میں منعقد ہونے والی اس ریلی میں بھرپور انداز میں شرکت کریں۔

بار ایسوسی ایشن کے اجلاس کی صدارت بار ایسوسی ایشن اسلام آباد کے صدر حفیظ اللہ یعقوب نے کی جبکہ اس موقع پر اسلام آباد ہائی کورٹ بار کے صدر زاہد محمود راجہ، اسلام آباد بار کونسل کے وائس چیئرمین سید قمر سبزواری، اسلام آباد بار ایسوسی ایشن کے سیکرٹری جنرل محمد بلال مغل اور بار کونسل کے ممبران اور وکلا کی بہت بڑی تعداد نے شرکت کی۔

یاد رہے کہ گزشتہ روز نیشنل پریس کلب اسلام آباد نے بھی اسلام آباد منعقد  ہونے والی کشمیر ریلی میں شکرکت کا اعلان کیا تھا اس سلسلہ میں اسلام آباد پریس کلب نے ریلی کے سلسلے میں ایک کیمپ لگانے کا بھی اعلان کیا ہے جس میں 23 فروری کی شام کو صد ر ریاست بیرسٹر سلطان محمود چوہدری بھی وزٹ کریں گے۔