فن گلوکاری کے ذریعے بھارتی فلم نگری پر طویل عرصے تک راج کرنے والی برصغیر کی لیجنڈ ری گلوکارہ لتا منگیشکر 92 سال کی عمر میں انتقال کر گئیں۔

 لتا منگیشکر کے انتقال پر پاکستانی سیاسی رہنماؤں نے بھی خراج عقیدت پیش کیا ہے۔

شہبازشریف

مسلم لیگ ن کے صدر اور اپوزیشن لیڈر قومی اسمبلی شہبازشریف نے کہاکہ لتا منگیشکر کے انتقال سے موسیقی کی دنیا ایک ایسے گلوکار سے محروم ہوگئی جس نے اپنی سریلی آواز سے نسلوں کو مسحور کیا۔

 انہوں نے مزید کہاکہ میری نسل کے لوگ اس کے خوبصورت گانے سنتے ہوئے بڑے ہوئے جو ہماری یادوں کا حصہ رہیں گے۔

In the passing of Lata Mangeshkar, the world of music has lost a singing legend who mesmerized generations with her melodious voice. The people of my generation grew up listening to her beautiful songs that will remain part of our memory. May she rest in peace!

— Shehbaz Sharif (@CMShehbaz) February 6, 2022

بلاول بھٹو زرداری

پاکستان پیپلزپارٹی کے چیئرمین بلاول بھٹو زرداری نے گلوکارہ لتا منگیشکر کی وفات پر اظہار افسوس کرتے ہوئے کہاکہ نصف صدی سے زائد اپنی آواز کا جادو جگا کر لتا منگیشکر نے کروڑوں انسانوں کو اپنے سنگیت کا گرویدہ بنایا۔

چیئرمین بلاول زرداری کا کہنا ہےکہ آنجہانی لتا منگیشکر برصغیر میں موسیقی کی ایک پہچان تھیں، فلمی صنعت کے لئے ان کی خدمات ناقابل فراموش ہیں۔

انہوں نے کہاکہ لتا منگیشکر کے گیت، ان کے نغمے اور سُر کبھی فراموش نہیں کئے جاسکیں گے۔

بلاول بھٹونے مزید کہاکہ لتا منگیشکر کی وفات دنیا بھر میں ان کے پرستاروں کے لئے ایک گہرا صدمہ ہے۔

فواد چوہدری

فواد چوہدری کا کہنا ہےکہ لتا منگیشکر کا انتقال موسیقی کے ایک عہد کا خاتمہ ہے۔

وفاقی وزیراطلاعات ونشریات فواد چوہدری نے سوشل میڈیا پر جاری اپنی ٹوئٹ میں کہاکہ لتا جی نے عشروں تک سر کی دنیا پر حکومت کی اور ان کی آواز کا جادو رہتی دنیا تک رہے گا۔

انہوں نے مزید کہاکہ جہاں جہاں اردو بولی اور سمجھی جاتی ہے وہاں لتا منگیشکر کو الوداع کہنے والوں کا ہجوم ہے۔

لتا منگیشکر کا انتقال موسیقی کے ایک عہد کا خاتمہ ہے، لتا جی نے عشروں تک سر کی دنیا پر حکومت کی اور ان کی آواز کا جادو رہتی دنیا تک رہے گا، جہاں جہاں اردو بولی اور سمجھی جاتی ہے وہاں لتا منگیشکر کو الوداع کہنے والوں کا ہجوم ہے، #LataMangeshkar

— Ch Fawad Hussain (@fawadchaudhry) February 6, 2022