پیپلزپارٹی کے سینیٹر سلیم مانڈوی والا نے کہا ہے کہ نجی ایئرلائنز کے تحفظات کو فوری طور پر حل کیا جائے۔

سلیم مانڈوی والا نے سول ایوی ایشن سے متعلق اپنے اہم بیان میں کہا کہ سول ایوی ایشن کی پاکستان کی نجی ایئرلائنز سے متعلق پالیسی پر کئی سوالات اٹھ رہے ہیں۔

انہوں نے کہا کہ ملک میں نجی ایئرلائنز کے ساتھ دھرا معیار کسی صورت قابل قبول نہیں، غیر ملکی ایئرلائنز اور پاکستان کی نجی ایئرلائنز کے ساتھ رکھا جانے والے رویے میں فرق واضح ہے۔

انکا کہنا ہے کہ ملک کی نجی ایئر لائنز کے ساتھ رکھا جانے والا رویہ قابل افسوس ہے، ہم مطالبہ کرتے ہیں کہ جو رویہ اور طریقہ کار غیر ملکی ایئرلائنز کے ساتھ رکھا جاتا ہے وہی طریقہ کار مقامی ایئرلائنز کے ساتھ بھی رکھا جائے۔

سلیم مانڈوی والا نے کہا کہ ہمیں اپنی خودمختاری اور ایئر اسپیس کا تحفظ کرنا چاہیے، غیر ملکی ایئرلائنز کے لئے وہ سہولیات اور آسانیاں پیدا کی جا رہی ہیں جو سہولیات اپنی ملکی نجی ایئرلائنز کے لئے میسر نہیں۔

انہوں نے کہا کہ غیر ملکی ایئرلائنز کی بجائے ہمیں اپنی ملکی نجی ایئرلائنز کو بچانے اور تحفظ فراہم کرنے کی ضرورت ہے، ہمیں غیر ملکی ایئرلائنز کو مقامی ایئر لائنز کے لائسنس کا غلط استعمال کرنے کی اجازت نہیں دینی چاہیے۔

سینیٹر سلیم مانڈوی والا نے مزید کہا کہ ایمریٹس ایئرلائنز کی کراچی کے لئے روزانہ پانچ فلائیٹس ہیں جبکہ پی آئی اے کی کراچی سے دبئی کے لئے روزانہ کوئی فلائیٹ تک نہیں، ہمیں غیر ملکی ایئرلائنز کو لوکل ایئر کے ذریعے پاکستان آنے کی اجازت نہیں دینی چاہئے۔