فہمیدہ مرزا نے کہا ہے کہ صوبے کھیلوں کے فروغ کیلئے اپنی ذمہ داریاں پوری کریں۔

وفاقی وزیر برائے بین الصوبائی رابطہ ڈاکٹر فہمیدہ مرزا نے راولپنڈی اسلام آباد اسپورٹس جرنلسٹس ایسو سی ایشن کی نو منتخب باڈی سے ملاقات کی۔

اس موقع پر وفاقی وزیر برائے بین الصوبائی رابطہ ڈاکٹر فہمیدہ مرزا نے رسجا کی نئی باڈی کو مبارکباد پیش کی اور کہا کہ رسجا نے جمہوری عمل مکمل کیا یہ خوش آئند ہے،اسی طرح سلسلہ چلتا رہے تو تنظیمیں اور ادارے مظبوط ہوں گے۔

انہوں نے کہا کہ میں نے بطور وفاقی وزیر کھیلوں کے شعبے میں پالیسی سطح پر تبدیلیاں لانے اور اصلاحات پر توجہ مرکوز کی ہے،نیشنل سپورٹس پالیسی کی تشکیل کی جا رہی ہے اس میں ہمیں بہت مشکلات کا سامنا ہے۔

وفاقی وزیر برائے بین الصوبائی رابطہ نے کہا کہ سپورٹس فیڈ ریشنزاور پاکستان اولمپکس ایسو سی ایشن تعاون نہیں کر رہیں۔

ڈاکٹر فہمیدہ مرزا کا کہنا تھا کہ وفاقی حکومت اپنی ذمہ داریاں پوری کریں گی، پاکستان میں کھیلوں کی بہتری کیلئے پالیسی سطح پر تبدیلیاں ناگزیر ہیں۔

وفاقی وزیر نے کہا کہ اولمپک ایسو سی ایشن اپنے کنڈٹ کے خلاف کام کر رہی ہے،پی او اے سپورٹس کے معاملات پر وفاقی حکومت کو ڈکٹیٹ نہیں کر سکتی،ہم نے نیشنل سپورٹس پالیسی پر پی او اے کی رائے مانگی تھی مگر پی او اے نے بجائے تعاون کرنے کے نیا محاذ کھول کیا۔

انہوں نے یہ بھی کہا کہ کھیلوں کی بہتری وزیر اعظم کی ترجیحات میں شامل ہے،وزیر اعظم ڈپارٹمنٹس کے بجائے ریجن کو طاقتور کرنا چاہتے ہیں اسی لیے حکومتی اداروں کو ڈپارٹمنٹس کی فنڈنگ روکنے کے احکامات دیے گئے۔

وفاقی وزیر برائے بین الصوبائی رابطہ ڈاکٹر فہمیدہ مرزا نے مزید کہا کہ صوبے کھیلوں کے فروغ کیلئے اپنا کردار ادا کریں،پنجاب اور کے پی کے نے اس حوالے سے بھرپور اقدامات کیے ہیں،اسپورٹس کا شاندار انفراسٹرکچر تیار ہو رہا ہے،ملاقات کے دوران رسجا کی باڈی نے وفاقی وزیر کو رسجا کی اعزازی رکنیت بھی دی۔