سندھ کے عوامی مسائل پر اپوزیشن جماعتوں نے اسمبلی اور عوامی عدالت میں مشترکہ جدوجہد پر اتفاق کیا ہے۔

اپوزیشن لیڈر سندھ اسمبلی حلیم عادل شیخ نے پی ٹی آئی، ایم کیوایم اور جی ڈی اے کے اراکین سے الگ الگ ملاقاتیں کیں۔

اپوزیشن لیڈر سندھ اسمبلی حلیم عادل شیخ نے پی ٹی آئی کے پارلیمانی لیڈر خرم شیرزمان ، ایم کیو ایم کے پارلیمانی لیڈر کنور نوید جمیل اور جی ڈی اے کے پارلیمانی لیڈر حسنین مرزا اور اراکین سے الگ الگ ملاقاتیں کیں۔

ملاقات میں کل سندھ اسمبلی کے ہونے والے اجلاس کے حوالے سے لائحہ عمل پر گفتگو ہوئی، تمام اپوزیشن جماعتیں کل کے اجلاس میں مشترکہ لائحہ عمل پر متفق ہوئے۔

تمام اپوزیشن جماعتوں نے کہا کہ سندھ حکومت کا آئین سے متصادم کالا قانون سپریم کورٹ ختم کرچکی ہے، نیا بلدیاتی بل اپوزیشن جماعتوں کی مشاورت سے اسمبلی میں لایا جائے گا۔

سندھ کے عوامی مسائل پر اپوزیشن جماعتوں نے اسمبلی اور عوامی عدالت میں مشترکہ جدوجہد پر اتفاق کیا، تمام اپوزیشن جماعتوں کی جانب سے سندھ حکومت کے خلاف بھرپور جدوجہد جاری رکھنے کے عزم کا اظہار کیا.

اپوزیشن لیڈر سندھ اسمبلی حلیم عادل شیخ نے کہا کہ سندھ میں اپوزیشن جماعتیں متحد اور عوامی مسائل پر ایک پیج پرہیں۔