رواں سال قطر میں منعقد کئے جانے فیفا ورلڈ کپ فٹ بال ٹورنامنٹ کے لئے 17 ملین شائقین نے ٹکٹس کے لئے درخواستیں جمع کرا دی ہیں۔

فیفا نے ٹکٹوں کے لئے درخواستیں لینے کا عمل 19 جنوری کو شروع کیا تھا جو کل 8 فروری کو ختم ہو گیا، فیفا نے اعلان کیا ہے کہ وہ ان درخواستوں کی جانچ پڑتال کرے گا۔

فیفا نے کہا کہ ایونٹ کے لئے درخواست جمع کرنے کا یہ پہلا مرحلہ تھا، جس میں غیر معمولی طور پر 17 ملین درخواستیں جمع ہوئیں، جو حیرت انگیز ہے۔

رواں سال کے اواخر میں ہونے والا یہ میگا ایونٹ جب سے قطر کو ملا ہے تب سے ہی متنازعہ رہا ہے، فیفا نے کہا کہ ہمیں قطر کی جانب سے سب سے زیادہ درخواستیں موصول ہونے کا اندازہ تھا۔

فیفا کے ترجمان نے کہا کہ اس پہلے مرحلے میں ارجنٹینا ، برازیل ، انگلینڈ ، فرانس ، بھارت ، میکسیکو ، سعودی عرب ، امریکہ اور متحدہ عرب امارات سے ریکارڈ درخواستیں موصول ہوئی ہیں۔

فٹ بال کی عالمی تنظیم فیفا نے کہا کہ 1.8 ملین افراد نے فائنل کے لئے درخواستیں جمع کرائی ہیں ، فائنل قطر کے دارالحکومت دوحہ کے لوسیل اسٹیڈیم میں کھیلا جائے گا ، جس میں 80 ہزار تماشائی بیٹھنے کی گنجائش ہے۔

فیفا نے کہا کہ ہماری منصوبہ بندی تھی کہ عرب میں ہونے والے اس پہلے ورلڈ کپ کے لئے 2 ملین ٹکٹس فروخت کئے جائیں گے۔

فیفا نے غیر معمولی درخواستیں جمع ہونے پر تشویش کا اظہار کیا ہے اور کہا کہ ہم شائقین فٹ بال کو مایوس نہیں کرنا چاہتے لیکن اتنی بڑی تعداد کو ٹکٹس دینا بھی ناممکن ہے۔

واضح رہے کہ پہلے مرحلے میں 17 ملین درخواستیں جمع ہونے کے بعد فیفا اور قطر کی فٹ بال انتظامیہ پر ذمہ داری بڑھ گئی ہیں۔