ایلون مسک کا نام کرپٹو کرنسی، اسپیس ایکس یا ٹیسلا کے حوالے سے تو کافی لوگ جانتے ہی ہیں، لیکن دنیا کے ارب پتی افراد کی فہرست میں شامل ایلون مسک طبی میدان میں بھی کام یابی کے جھنڈے گاڑنے کی ریس میں شامل ہیں۔

ایلون مسک انسانی دماغ کو کنٹرول کرنے والی ’ برین چپ‘ کی تیاری کے لیے کام کرنے والی کمپنی ’نیورالنک‘ کے مالک بھی ہیں۔

ایلون مسک کی اس نیوروٹیکنالوجی کمپنی کا مقصد انسانی دماغ کے لیے ایسی چپ کی تیاری ہے جس کی بدولت اسے براہ راست کمپیوٹر سے منسلک کیا جاسکے گا۔

اس بابت مسک کا دعویٰ ہے کہ اس ٹیکنالوجی کی مدد سے لوگ صرف اپنی سوچ کی مدد سے کئی کام سرانجام دینے کا اہل ہوجائیں گے۔

ایلون کا مقصد لوگوں کوایک مختلف طریقے سے اپنی آزادی کو ایکسپلور کرنے میں مدد کرنا ہے۔

 یہ بھی پڑھیں: لیباریٹری میں جانوروں پر ظلم، ایلون مسک کے خلاف درخواست دائر

ان کا کہنا ہے کہ اس برین چپ ٹیکنالوجی کی مدد سے کسی بھی فرد میں پیدا ہونے والے دماغی اور نفیساتی عوارض کا کام یابی سے علاج کیا جاسکے گا، لوگ اپنی یادداشت کو محفوظ کر کے ضرورت پڑنے پر اسے دوبارہ بحال کر سکیں گے۔

یہ بالکل ایسا ہی ہے جس طرح ہم کمپیوٹر ہارڈ ڈرائیو میں اپنی اہم دستاویزات اور تصاویر کوآئندہ کے لیے محفوظ کرلیتے ہیں۔

اس ٹیکنالوجی کی مدد سے طبی ماہرین کسی بھی مریض کو بے ہوش کیے بنا با آسانی ایک گھنٹے سے بھی کم وقت میں برین چپ داخل کرکےدماغ کی پیچیدہ جراحی بھی کرسکین گے۔

وا ضح رہے کہ کچھ عرصے قبل ہی امریکی عدالت میں 8 بندروں کی ہلاکت اور جانوروں کے ساتھ بے رحمانہ سلوک روا رکھنے کے الزام میں نیورالنک کے خلاف درخواست دائر کی گئی تھی ۔

درخواست میں نیورالنک پر الزام عائد کیا گیا تھا کہ مذکورہ کمپنی انسانی دماغ پر قابو پانے کے تجربات کے لیے میکا ک نسل( لنگور کی نسل سے تعلق رکھنے والے میکاک بندر کا شمار دنیا کے قدیم ترین اور اعلی حیوانات میں کیا جاتاہے) کے بندروں کے ساتھ ظالمانہ سلوک کر رہی ہے۔

درخواست میں مزید کہاگیا تھا کہ نیورالنک نے تجربہ گاہ میں 23 بندروں پر بہت ہلاکت خیز دماغی تجربات کیے ہیں ، جب کہ بہت سے جانوروں کے دماغ میں برقیرے ( الیکٹراڈز) نصب کرنے کے لیے ان کی کھوپڑی کے اوپری حصے کو ہٹا دیا گیا ہے۔

تاہم نیورا لنک نے اپنے بلاگ میں ان تمام تر الزامات کی تردید کرتے ہوئے کہا تھا کہ’ ہم جانوروں کی فلاح پر یقین رکھتے ہیں ہم جانوروں سے بہت زیادہ انسانی اور اخلاقی برتاؤ روا رکھتے ہیں۔‘

جب کہ ایلون مسک کے جانب سے اس معاملے پر تاحال کوئی بیان سامنے نہیں آیا۔