پاکستان ویمن کرکٹ ٹیم کی کپتان بسمہ معروف  چاہتی ہیں کہ بھارت اور پاکستان کا ورلڈ کپ میچ سرحد پار کی لڑکیوں کے لیے متاثر کن ہو۔

وہ عالمی کپ میں روایتی حریف بھارت کے خلاف کھیلنے کے دباؤ کو جانتی ہیں لیکن قومی  کپتان کو امید ہے کہ بھارت کے خلاف ان کا میچ دونوں ممالک کی لڑکیوں کو کرکٹ کو اپنے کیریئر کے طور پر لینے کی ترغیب دے گا۔

بسمہ معروف نے کہا کہ پاکستان بمقابلہ بھارت واقعی کسی بھی کھلاڑی کے لیے اپنی اسناد قائم کرنے کا ایک بہترین مرحلہ ہے، لیکن دن کے اختتام پر یہ ایک کرکٹ میچ ہے جسے بنیادی باتوں کو درست طریقے سے انجام دینے اور چیزوں کو سادہ رکھ کر جیتنا ہوتا ہے۔

قومی کپتان کا کہنا تھاکہ یہ میچ پاکستان اور بھارت کی لاکھوں لڑکیوں کو اس کھیل کو بطور پیشہ اپنانے کی ترغیب دینے کا ایک بہترین موقع ہے۔

ان کا کہنا تھا کہ مجھے امید ہے کہ دونوں ممالک کی لڑکیاں یہ میچ دیکھیں گی اور اس کھیل کو آگے بڑھانے کے لیے حوصلہ افزائی کریں گی۔

بسمہ نے کہا کہ بھارتی ٹیم ایک اچھی ٹیم ہے اور حال ہی میں اچھی کارکردگی کا مظاہرہ کیا ہے تاہم ہمارا مقصد سیمی فائنل میں جگہ بنانا ہے، جو ہم نے پہلے کبھی نہیں کیا۔

بسمہ نے کہا کہ سینئر کھلاڑی اور ٹیم کے کپتان ہونے کے ناطے آپ کو اپنی ٹیم کی حوصلہ افزائی کرنی ہوگی اگر آپ صحیح کام نہیں کررہے ہیں تو آپ لڑکیوں سے ان کا مطالبہ نہیں کرسکتے ہیں، میرا اس ٹیم کے ساتھ بہت واضح نقطہ نظر ہے جس کی ہمیں ضرورت ہے۔

پاکستان کا ویمنز ورلڈ کپ کے افتتاحی میچ میں بھارت سے مقابلہ 6 مارچ کو ماؤنٹ مونگانوئی میں ہونا ہےیہ ٹورنامنٹ  نیوزی لینڈ کے چھ شہروں میں 4 مارچ سے 3 اپریل تک کھیلا جائے گا۔اپنی پلیئنگ الیون کے بارے میں بات کرتے ہوئے بسمہ نے کہا کہ ٹیم کا فیصلہ نیوزی لینڈ کے حالات کا جائزہ لینے کے بعد کیا جائے گا۔

واضح رہے کہ بسمہ معروف نے 108 ون ڈے اور اتنے ہی ٹی ٹوئنٹی میں پاکستان کی نمائندگی کی ہے اور بالترتیب 2602 اور 2225 رنز بنائے ہیں۔