انڈونیشیا کا صوبہ سماٹرا 6.2 شدت کے زلزلے سے لرز اٹھا، اور ابتدائی طور پر 7 افراد کے ہلاک ہونے کی اطلاعات ہیں۔

انتظامیہ نے سونامی کی وارننگ جاری نہیں کی۔

چینی خبر رساں ادارے کے مطا بق انڈونیشیا کے محکمہ موسمیات اور جیو فزکس ایجنسی نے بتایا کہ انڈونیشیا کے مغربی صوبے سماٹرا میں جمعہ کی صبح مقامی وقت کے مطابق 8 بجکر 39 منٹ پر زلزلے کے جھٹکے محسوس کیے گئے۔

ابتدائی طور پر7 افراد کے ہلاک ہونے کی اطلاعات موصول ہوئی ہیں، کچھ علاقوں میں کچے اور کمزور عمارتوں کے منہدم ہونے کی اطلاعات موصول ہوئیں ہیں۔

سماٹرا کی انتظامیہ نے ریسکیو ٹیموں کو الرٹ رہنے کا حکم دے دیا ہے، اور کہا ہے کہ آفٹر شاکس کے امکانات کو رد نہیں کیا جاسکتا۔

ریکٹر سکیل پر زلزلے کی شدت 6.2 ریکارڈ کی گئی ، زلزے کا مرکزپسمان برات ضلع سے 17 کلومیٹر شمال مشرق میں 10 کلو میٹر زمین کی گہرائی میں تھا۔

زلزلے کے جھٹکے پڑوسی ملک ملائشیا اور سنگاپور میں بھی محسوس کئے گئے۔

محکمہ موسمیات اور جیو فزکس ایجنسی نے کہا ہے کہ زلزلے کے باعث سونامی کا کوئی خطرہ نہیں ہے، محکمہ موسمیات کے ترجمان نے کہا کہ آفٹر شاکس کی اطلاع موصول نہیں ہوئی ہے۔

انڈونیشیا کی حکومت نے سماٹرا میں پولیس اور اسپتال کے عملے کو الرٹ کر دیا ہے۔