فرخ حبیب نے کہا ہے کہ عمران خان پہلا وزیراعظم ہے جو بیرون ملک جائیدادیں نہیں بنا رہا۔

وزیر مملکت برائے اطلاعات و نشریات فرخ حبیب نے فیصل آباد میں سماجی تنظیم کے زیر اہتمام منعقدہ تقریب سے خطاب کرتے ہوئے کہا کہ حکومت عوامی ترجیحات کے منصوبوں پر کام کر رہی ہے ، ماضی کے قرضوں کا بوجھ اور مشکلات کا بھی سامنا ہے۔

انہوں نے کہا کہ 260 ارب کے احساس پروگرام میں 70 لاکھ خاندانوں کی کفالت کی جارہی جبکہ کم آمدنی والے افراد کے بچوں کی تعلیم کیلئے وظائف فراہم کئے جارہے ہیں۔

وزیر مملکت کا کہنا تھا کہ اعلیٰ تعلیم کیلئے سالانہ 50 ہزار اسکالر شپ دی جارہی ہیں جبکہ احساس راشن پروگرام کے تحت 2 کروڑ خاندانوں کو آٹا، گھی اور دالوں پر سبسڈی دی جارہی ہے۔

فرخ حبیب کا یہ بھی کہنا تھا کہ نوجوانوں کو پاؤں پر کھڑا کرنے کیلئے کامیاب پاکستان پروگرام شروع کیا ہے۔

وزیر مملکت کا کہنا تھا کہ لاہور، راولپنڈی ، ڈیرہ غازی خاں کے بعد 9 فروری کو فیصل آباد ڈویژن میں بھی صحت کارڈ کی سہولت فراہم کی جارہی ہے، وزیر اعظم عمران خان یہاں آکر صحت کارڈ تقسیم کریں گے۔

انہوں نے کہا کہ عمران خان پہلا وزیراعظم ہے جو نہ بیرون جائیدادیں بنا رہا ہے نہ ماضی کی طرح رشتہ داروں کو اعلیٰ عہدوں پر بٹھایا ہے۔

وزیر مملکت برائے اطلاعات و نشریات فرخ حبیب نے مزید کہا کہ ماضی میں عوام کے ٹیکسوں کی رقم لوٹ کر بیرون ملک جائیدادیں بنائی گئیں، ملکی تاریخ میں پہلی مرتبہ ٹیکسوں کا پیسہ عوام کی فلاح و بہبود پر خرچ کیا جارہا ہے ۔